Նայեք մյուս ուժերին, մի քանի ամիս առաջ բարձրագույն իշխանության էին, այսօր ասում են՝ մենք ընդդիմություն ենք․ Աղվան Վարդանյանը՝ Արտաշատում (տեսանյութ)
Արարատի մարզկենտրոն Արտաշատում ՀՅԴ քարոզարշավի ժամանակ կուսակցության անդամ, ԱԺ ՀՅԴ խմբակցության քարտուղար Աղվան Վարդանյանն ասաց, որ սպասվում են նոր Ազգային ժողովի ընտրություններ՝ նոր բովանդակությամբ:
«Մենք 2018 թվականին այլևս համապետական ընտրություններով նախագահ չենք ընտրելու, նախագահ Ազգային ժողովն է ընտրելու, բայց շատ սահմանափակ լիազորություններով»,- ասաց նա:
Դիմելով արտաշատցիներին՝ նշեց, որ նրանք են որոշելու, թե ինչպիսի Ազգային ժողով են ցանկանում ունենալ: «Ընտրությունը համեմատություն է, պետք է Ձեր առաջ փռեք մասնակցող ինը քաղաքական ուժերին,նայեք ու հասկանաք մեկ առ մեկ, թե որն ինչ առավելություն, ինչ թերություն ունի»,- ասաց նա՝ նշելով, որ Դաշնակցությունը որակապես տարբերվում է մյուս կուսակցություններից:
Համեմատություն անցկացնելով այլ կուսակցությունների հետ՝ նա հարցրեց, թե որ կուսակցությունն է, որ ժողովրդի կյանքում կենսագրություն և փորձառություն ունի, անցյալ ու արած ունի:
«Ո՞ր կուսակցությունն է, որ մեկ անձի, մեկ առաջնորդի կուսակցություն չէ: Նայեք, համեմատեք: Եվ տեսեք մյուս կուսակցությունները՝ մեկ հոգի խոսում է, մյուսները, ամբողջ կուսակցությունը կրկնում է նրա ասածները: Ասում է՝ այս կողմ անցեք, այս կողմ են անցնում, հետո ասում է՝ մյուս կողմ անցեք, մյուս կողմ են անցնում»,- ասաց նա:
Նշեց, որ մյուս կուսակցությունների թեկնածուները իրարից ձայն են խլում:
«Ուրիշները ասում են՝ մենք գալիս ենք փոփոխություններ կատարելու, Դաշնակցությունն արդեն համակարգային փոփոխություն է արել, կառավարման համակարգ է փոխել, ընտրական համակարգ է փոխել: Նայեք մյուս ուժերին, մի քանի ամիս առաջ բարձրագույն իշխանության կրողներն էին, այսօր ասում են՝ մենք ընդդիմություն ենք և մեղադրում են իշխանությանը բոլոր այն մեղքերի մեջ, որոնց մեջ մի քանի ամիս առաջ նրանց էին մեղադրում: Դուք ժողովուրդ եք, դուք եք որոշում: Մարդ քանի՞ երես կարող է ունենալ՝ մարդ ո՞նց կարող է իրեն թույլ տալ՝ այսօր ասի մի բան, վեց ամիս հետո լրիվ հակառակը: Կուսակցությունը ո՞նց կարող է իրեն թույլ տալ հարյուրտոկոսանոց սուտ խոստումներ տալ, բայց նայել Ձեր աչքերին: Անցնելու է, չէ՞ ապրիլի 3-ը: Այդ սուտ խոստումներ տվողները, որոնք ամբողջ օրը Ձեր աչքի առաջ են, պետք է պատասխան տա՞ն, թե՝ ոչ»,- ասաց նա:
Մանրամասները՝ տեսանյութում:










