Պորոշենկոն ՌԴ պետդումայի նախկին պատգամավորի սպանությունը ՌԴ-ի կողմից «պետական ահաբեկչական ակտ» է անվանել. Կրեմլը մեկնաբանել է
Ուկրաինայի նախագահ Պյոտր Պորոշենկոն Ռուսաստանին մեղադրել է Պետդումայի նախկին պատգամավոր Դենիս Վորոնենկովի սպանության համար, գրում է ТАСС-ը:
Ուժայինների հետ խորհրդակցությանը նա տեղի ունեցածն անվանել է «Ռուսաստանի կողմից պետական ահաբեկչական ակտ»: «Ռուսական հատուկ ծառայությունների ակնհայտ ձեռագիր, որը նախկինում բազմիցս երևացել է տարբեր եվրոպական քաղաքներում»,-ասել է Ուկրաինայի նախագահը:
Նա նաև նշել է, որ Վորոնենկովը պետական դավաճանության համար մեղադրվող նախկին նախագահ Վիկտոր Յանուկովիչի գործով գլխավոր վկաներից մեկն էր:
Բացի այդ, նախագահը Վորոնենկովի սպանությունը կապել է Խարկովի շրջանում ռազմամթերքի պահեստում այս գիշեր տեղի ունեցած հրդեհի հետ: «Պատահական չեմ համարում, որ սպանությունը տեղի է ունեցել Խարկովի շրջանում Բակակլեյա քաղաքում տեղի ունեցած դիվերսիայի նույն օրը»,- հայտարարել է նա:
Կրեմլում Վորոնենկովի սպանության գործում ռուսական հետքի մասին խոսքերն «անհեթեթություն» են անվանել և հույս են հայտնել, որ հանցագործությանը ներգրավված բոլոր անձինք կհայտնաբերվեն: Այդ մասին հայտարարել է ՌԴ նախագահի մամուլի քարտուղար Դմիտրի Պեսկովը: Նրա խոսքով՝ տեղի ունեցածը խոսում է այն մասին, որ ուկրաինական կողմը չի կարողացել ապահովել Վորոնենկովի անվտանգությունը:
Ավելի վաղ հաղորդվել է, որ Ուկրաինայի մայրաքաղաք Կիևում սպանվել է Ռուսաստանի Դաշնության Պետդումայի նախկին պատգամավոր Դենիս Վորոնենկովը, որին գնդակահարել են քաղաքի կենտրոնում: Կիևի ոստիկանապետը տեղեկացրել է, որ սպանվածից բացի՝ կա 2 վիրավոր: Տարբեր աղբյուրների փոխանցմամբ՝ զոհվել է նաև նախկին պատգամավորի թիկնապահը: Ականատեսների պատմելով՝ դեպքի վայրում հնչել է 7 կրակոց: Կիևի ոստիկանության վարչության պետ Անդրեյ Կրիշչենկոն հայտարարել է, որ Ռուսաստանի Դաշնության պետդումայի նախկին պատգամավոր Դենիս Վորոնենկովի սպանության համար կասկածվող անձը ձերբակալվել է:
Վորոնենկովը, քաղաքացիություն ստանալով, անցած տարվա վերջին կնոջ հետ մշտական բնակություն է հաստատել Ուկրաինայում: Ռուսաստանում նրա դեմ միջազգային հետախուզում է հայտարարվել: Հայտնի է, որ նախկին պատգամավորը մեղադրվում էր խոշոր ընկերության շենքի յուրացման համար:










