Լոնդոնի ահաբեկչության զոհերից մեկը ճակատագրական պահին գնալիս է եղել դպրոց՝ երեխաներին վերցնելու (լուսանկարներ)
Մարտի 22-ին Լոնդոնում տեղի ունեցած ահաբեկչության զոհերից մեկի ինքնությունն արդեն հայտնի է:
Ինչպես նշում է The Daily Mail-ը, սպանվածներից մեկը 43-ամյա Այշա Ֆրեյդն է, որը ճակատագրական պահին գնում էր իր 2 դուստրերին դպրոցից տուն բերելու:
Հայտնի է, որ կինն իսպաներենի ուսուցչուհի էր:
Ինչպես ավելի վաղ հայտնել էր Tert.am-ը, Մեծ Բրիտանիայի ոստիկանությունն ահաբեկչությունից հետո 7 մարդու է ձերբակալել Լոնդոնում, Բիրմինգհեմում և այլ քաղաքներում։
Բիրմինգհեմում խուզարկություն է անցկացվել ահաբեկչի տանը:
Նշենք, որ հարձակվողը Վեսթմինսթերյան կամրջի վրա միտումնավոր մեքենայի տակ է գցել 2 հոգու, ինչից հետո, դանակով զինված, փորձել է ներխուժել խորհրդարանի շենք: Նա դանակահարել է անզեն ոստիկանին, ինչից հետո իրավապահները վնասազերծել են տղամարդուն:
Ոստիկանության նախնական տվյալներով՝ իսլամիստական գաղափարախոսության հետևորդ ահաբեկիչը գործել է միայնակ: Իրավապահներին արդեն հաջողվել է պարզել նրա ինքնությունը, այժմ նրանք փորձում են գտնել հնարավոր հանցակիցներին:
Վարչապետ Թերեզա Մեյը տեղի ունեցածը որակել է որպես «զզվելի ու անբարոյական արարք»՝ ընդգծելով, որ այն չի կարող թուլացնել բրիտանական արժեքները: Նա նաև ասել է, որ երկրի խորհրդարանը հինգշաբթի կշարունակի իր բնականոն աշխատանքը:













