Հայաստանը միջազգային մամուլում բավականին լավ է լուսաբանվում. The Huffington Post-ի սյունակագիր
Միակ բանը, որ Հայաստանի մասին գիտեի մինչև Հայաստան գալս, Հայոց ցեղասպանությունն էր․ Tert.am-ի հետ զրույցում այսպես ասաց Երևան ժամանած Huffington Post «Twitter Powerhouses Series»-ի համահիմնադիր, The Huffington Post-ի սյունակագիր, հաղորդակցության մասնագետ Շոն Գարդները:
«Հիմա արդեն, երբ եկել եմ Հայաստան, գիտեմ նրա աշխարհագրությունը: Ես շատ հավանեցի Հայաստանը, շատ լավ էր, որ եկա: Սիրում եմ միջմշակութային հաղորդակցությունը: Հետաքրքիր է, թե մարդիկ ինչ են անում, ինչպես են մտածում և ոչ միայն հենց իրենց մասին, այլ ընդհանրապես, թե ինչ են մտածում աշխարհի մասին»,- ասաց նա:
Գարդները նշեց, որ եկել է նաև Հայաստանի մասին գրելու համար:
Խոսելով երկրի բրենդինգը զարգացնելու, այն ավելի ճանաչելի դարձնելու մասին՝ The Huffington Post-ի սյունակագիր նշեց, որ բիզնեսը՝ գումար ստեղծելը, աշխարհի տարբեր կետերի հետ համագործակցելով կարելի է զարգացնել, երկրի բրենդն առաջ տանել: «Բայց եթե ցանկանում եմ ստեղծել գումար, դու պետք է մարդկանց ինչ-որ բան տաս: Դու պետք է ցույց տաս, որ մարդկանց տալիս ես ինչ-որ բան: Կարծում եմ, որ դա ամենաուժեղ մոդուլն է բիզնեսում․ դու ոչ միայն վերցնում ես փողեր, այլ նաև ներդրում ես անում»,- ասաց նա:
Անդրադառնալով միջազգային մամուլում Հայաստանի ճանաչելիությանը, այնտեղ հայաստանյան խնդիրների լուսաբանմանը՝ կապված արտաքին քաղաքականության հետ, Գարդները նշեց, որ կարծում է՝ Հայաստանը բավականի լավ է լուսաբանվում: «Ես դիտում եմ BBC, CBC, կարդում եմ ամերիկյան մամուլը: Նրանք բավականին լավ են լուսաբանում Հայաստանը, բայց, կարծում եմ, որ եվրոպական մամուլը դա ավելի լավ է անում: Նրանք անդրադառնում են Հայաստանի տնտեսությանը, մշակույթին և այլն: Ինձ, օրինակ, առավել հետաքրքիր է ոչ թե այն, թե տվյալ երկիրն ինչերի միջով է անցել, այլ առավել շատ այն, թե ինչ է պատրաստվում անել, ինչպիսին նա կլինի հաջորդ տարում, այդ երկրի բնակչության երազանքների մասին եմ ցանկանում իմանալ, թե որտեղ են նրանք ցանկանում տեսնել իրենց երկիրը հաջորդ տարում»,- ասաց նա:










