Ոստիկանապետի կողմից կա հստակ հանձնարարական՝ ամեն ինչ անել, որ ընտրական գործընթացի վրա ստվեր չընկնի. Մնացական Բիչախչյան
Ոստիկանապետ Վլադիմիր Գասպարյանի կողմից կա հստակ հանձնարարական՝ ամեն ինչ անել, որ ընտրական գործընթացի վրա ստվեր չընկնի: Այս մասին «Ազատություն» ռադիոկայանի ուղիղ եթերում ասաց ՀՀ ոստիկանության անձնագրային և վիզաների վարչության պետ Մնացական Բիչախչյանը:
«Այն պահից սկսված, երբ սկսեց վիճարկվել, շահարկվել լրացուցիչ ցուցակներում անձանց ընդգրկվելու հարցը, և ընդհանրապես ընտրական գործընթացներով պայմանավորված բոլոր գործառույթների առումով, ոստիկանության պետի կողմից հստակ հանձնարարական տրվեց՝ ամեն ինչ անել, որպեսզի թույլ չտրվեն չարաշահումներ և որ ընտրական գործընթացի վրա ստվեր չընկնի»,- ասաց Բիչախչյանը:
Նրա տեղեկացմամբ՝ նախորդ համապետական ընտրությունների ժամանակ՝ ըստ գտնվելու վայրի, ցուցակում ընդգրկվելու համար տրամադրվել է մոտ 17 հազար տեղեկանք, իսկ այս ընտրություններին այդ թիվը 28 հազար է: Թվի ավելացման հետ կապված ոստիկանության անձնագրային և վիզաների վարչության պետը հետևյալ պարզաբանումն արեց. «Հայաստանի Հանրապետության համար 28 հազարը և 17 հազարը, կարծում եմ, մեծ թիվ չէ: Բացի դրանից՝ նոր ԸՕ-ով, ըստ գտնվելու վայրի, ցուցակում ընդգրկվելու համար դիմում կարող են ներկայացնել նաև ընտրական հանձնաժողովի անդամները: Կան այլ աշխատողներ, ծառայողներ ևս, որոնք գտնվում են իրենց բնակության վայրից դուրս»:
Բիչախչյանը նշեց, որ ՀՀ ընտրողների ռեգիստրում ընդգրկված ընտրողների թվի նախնական հրապարակումից հետո այդ թիվը մոտ 500-ով նվազել է. «Կատարվում են ճշգրտումներ, մահացած անձանց տվյալները հանվում են պետական ռեգիստրից»,- ասաց նա:
Հարցին, թե ԱՎԾ տվյալներով բնակչությունը 3 մլն է, իսկ ռեգիստրում ընդգրկված է 2.5 մլն ընտրող, ինչպես է ստացվում, որ բնակչության մոտ 85 տոկոսը ընտրելու իրավունք ունի, Բիչախչյանը պատասխանեց. «Այլ բան է վիճակագրական վերլուծությունը և այլ բան է բնակչության պետական ռեգիստրում հաշվառում ունենալը»:










