ԱՄՆ մի շարք սենատորներ կոչ են անում ստուգել Բաքվում Թրամփի ընկերության գործունեությունը
ԱՄՆ մի շարք սենատորներ նամակ են գրել երկրի գլխավոր դատախազին, Հետաքննությունների դաշնային բյուրոյի տնօրենին ու ֆինանսների նախարարին՝ կոչ անելով հետաքննել Դոնալդ Թրամփի ընկերության գործունեությունն Ադրբեջանում՝ կոռուպցիոն խախտումների և Իրանի իսլամական հեղափոխության պահապանների կորպուսի հետ կապերի կասկածանքի առնչությամբ: Այս մասին հայտնում են ամերիկյան լրատվամիջոցները՝ ՏԱՍՍ գործակալության փոխանցմամբ:
Սենատորներ Շերոդ Բրաունը, Դայեն Ֆայնսթայնն ու Բեն Կարդինն իրենց ստորագրած նամակով կոչ են անում նշված անձանց ստուգել Բաքվում Trump Organization-ի կողմից հյուրանոցի շինարարության մասին մարտին հրապարակված հոդվածի իսկությունը:
Այնտեղ, մասնավորապես, նշվում էր, որ Թրամփի ընկերության գործընկերները բաքվեցի խոշոր ձեռնարկատերեր Անար ու Էլթոն Մամեդովներն են՝ Ադրբեջանի տրանսպորտի նախարարի ազգականները։
Այս ամենն, ըստ հոդվածի հեղինակների, վկայում է այն մասին, որ Թրամփի ընկերությունը խախտել է ամերիկյան օրենսդրությունը, որով արգելվում է օգուտ ապահովել արտասահմանյան իշխանություններին՝ փոխադարձ արտոնությունների հույսով։










