Մենք պետք է փոխենք ամբողջ քաղաքական կառուցվածքը, որ մեր տատիկներն ու պապիկներն այդ 15 հազար դրամի կարիքը չունենան. Զ. Փոստանջյան
«Երկիր ծիրանի» կուսակցության նախագահ Զարուհի Փոստանջյանը կուսակիցների հետ այցելեց «Հաղթանակ» զբոսայգի, ծաղիկներ խոնարհեց Անհայտ զինվորի գերեզմանին և իր հարգանքի տուրքը մատուցեց Շուշիի ազատագրման և Հայրենական պատերազմի ընթացքում զոհվածների հիշատակին: Այնուհետև երթով շարժվեցին դեպի «Եռաբլուր» պանթեոն:
«Մենք հաղթանակի երկիր ենք, եթե մեր 20-ամյա զինվորը կարողացել է ունենալ բարձր քաղաքացիական, քաղաքական կամք, պահել է սահմանն անցյալ տարի, կանխել է թշնամու մուտքը մեր մայրաքաղաք Ստեփանակերտ, ուրեմն մեր տատիկ-պապիկներն էլ կարող են մայիսի 14-ին գնալ մարտի, վերցնել իշխանությունը, վերադարձնել այն մեր ժողովրդին»,-լրագրողների հետ զրույցում ասաց քաղաքապետի թեկնածու Զարուհի Փոստանջյանը:
Նա, անդրադառնալով Երևանի ավագանու ընտրություններին «Ելք» դաշինքի ցուցակը գլխավորող Նիկոլ Փաշինյանի այն հայտարարությանը, որ բոլոր նրանց, ովքեր չեն վերցնի ընտրակաշառք քաղաքապետարանի սոցիալական ֆոնդից կտրամադրի 15 հազարական դրամ, ասաց. «Քաղաքապետարանը և թաղապետարաններն ունեն հատուկ ֆոնդեր, որոնք սոցիալապես անապահով խավերին տրամադրում են օգնություն: Հետևաբար, ես չեմ կարծում, որ այդ օգնությունը պետք է շահարկվի: Այդ սոցիալական աջակցությունն այս պահին էլ տրամադրվում է սոցիալապես անապահովներին: Լրացուցիչ գալ ասել, որ ես էլ կտրամադրեմ, ճիշտ չէ: Սոցիալապես անապահով շերտերը, երբ գնում են ընտրակաշառք վերցնելու քայլին, նրանք խոցելի են, նրանից շատերը սոված են ուղղակի»:
«Երկիր ծիրանի» կուսակցության նախագահը փաստում է, որ ՀՀ-ում մեկ միլիոնից ավելի մարդ գտնվում է աղքատության մեջ: Դա պաշտոնական տվյալ է:
«Նույնիսկ այդ 15 հազարական դրամները նրանց չի բավարարում: Մենք պետք է փոխենք ամբողջ քաղաքական կառուցվածքը, որ մեր տատիկներն ու պապիկներն այդ 15 հազար դրամի կարիքը չունենան: Եթե դու չես լուծում համակարգային խնդիրը, եթե դու չես փոխում համակարգը և քաղաքական կառուցվածքը, ապա մեր սոցիալապես անապահով խավն անընդհատ այդ գումարի կարիքն է ունենալու»,-հավաստիացրեց Զարուհի Փոստանջյանը: Երևանի ավագանու ընտրություններում ընտրակաշառք բաժանելու դեպքերի մասին «Երկիր ծիրանի»-ի ղեկավարն ասաց, որ արդեն 25 տարի նույն իրավիճակն է, հավաքագրումներ են տեղի ունենում:
«Գիտենք, որ ուսուցչանոցներում ժողովներ են լինում, բայց ես հավատում եմ նույնիսկ այդ խոցելի մարդկանց, նույնիսկ նրանց, ում նկատմամբ բռնություն է կիրառվում, նրանց քաղաքացիական, սոցիալական բարձր գիտակցությանը»,- վստահություն հայտնեց:
Զանի Հարոյան










