«Այո՛, մենք դա արեցինք. ԵՄ-ի հետ առանց վիզայի ռեժիմի մասին համաձայնագիրը կստորագրվի մայիսի 17-ին». Պորոշենկո (տեսանյութ)
Ուկրաինայի իշխանությունները հույս ունեն, որ դեպի Եվրոպա երկրի քաղաքացիների համար առանց վիզայի ուղևորությունների մասին համաձայնագիրն ուժի մեջ կմտնի հունիսին:
Երկրի նախագահ Պյոտր Պորոշենկոն հայտարարել է, որ պատրաստվում է ստորագրել ուկրաինացիներին առանց վիզայի ռեժիմի տրամադրման մասին վերջնական օրենքը հաջորդ շաբաթ Ստրասբուրգ այցի ընթացքում, գրում է BBC-ի ռուսական ծառայությունը:
Ավելի վաղ հայտնի է դարձել, որ ԵՄ խորհուրդը հաստատել է համապատասխան նախաձեռնությունը, որը հավանության էր արժանացրել Եվրախորհրդարանը:
«Այո՛, մենք դա արեցինք: Հենց նոր Եվրամիության նախարարների խորհուրդը հավանության է արժանացրել մեզ՝ Ուկրաինայի քաղաքացիներիս, առանց վիզայի ուղևորությունների իրավունքի տրամադրման մասին վերջնական որոշումը»,- հայտարարել է Պյոտր Պորոշենկոն Facebook-ում հրապարակված տեսաուղերձում:
«Մայիսի 17-ին Ստրասբուրգում, ինչպես մենք պայմանավորվել ենք մեր եվրոպացի ընկերների հետ, հանդիսավոր կերպով կստորագրվի համապատասխան օրենսդրական ակտը: Դա հավանաբար կլինի նախագահի պաշտոնում երեք տարվա ընթացքում իմ ամենակարևոր այցերից մեկը»,- հավելել է Պորոշենկոն:
Նախագահը հույս է հայտնել, որ որոշումն ուժի մեջ կմտնի մոտավորապես հունիսի 11-ին:
Ավելի վաղ հաղորդվել է, որ Եվրամիության խորհուրդը հաստատել է Ուկրաինայի քաղաքացիների համար Շենգեն գոտու երկրներ կարճաժամկետ ուղևորությունների համար առանց վիզայի ռեժիմ սահմանելու օրենսդրական նախաձեռնությունը:










