Սփյուռքի հայը կարծում է, որ Հայաստանը «Disney land» պիտի լինի, բայց Հայաստանն էլ իր խնդիրներն ունի. Սերխիո Նահապետյան
Ռամկավարական ազատական կուսակցության կենտրոնական վարչության ատենապետ, Բուենոս Այրես նահանգի Ներկայացուցիչների Պալատի նախկին պատգամավոր Սերխիո Նահապետյանի կարծիքով՝ Հայաստանը և սփյուռքը, որպես մեկ մարմին, պետք է միասին աշխատեն հայաստանյան բոլոր խնդիրները լուծելու ուղղությամբ: Tert.am-ի հետ զրույցում նա նշեց, որ կարևոր է աշխատել և՛ Հայոց ցեղասպանության ճանաչման, և՛ Արցախի ճանաչման գործընթացների վրա, ինչպես նաև՝ պետք է աշխատել Հայաստանի տնտեսական կյանքը զարգացնելու ուղղությամբ:
«Մենք՝ որպես սփյուռքյան կուսակցություն, պետք է աշխատենք Հայաստանի մնացած կուսակցությունների, Հայաստանի կառավարության հետ ժողովրդի կյանքի, այլ ոչ թե անձերի կյանքի բարելավման համար»․- ասաց նա՝ նշելով, որ այդ կապերը զարգացնելու արդյունքում Հայաստան-սփյուռք կապը կամրանա:
Սերխիո Նահապետյանը նշեց, որ սփյուռքը և Հայաստանը հիմա էլ միասնական նպատակներ ունեն: Հիմա, ըստ նրա, սփյուռքյան կառույցների ուշադրության կենտրոնում Արցախի ճանաչման գործընթացն է, իսկ Հայոց ցեղասպանության ճանաչման գործընթացն արդեն իր ճանապարհն անցել է: «Հիմա պետք է Արցախի վրա աշխատենք, և Արցախի ժողովրդի իրավունքները պաշտպանենք»,- ասաց նա՝ նշելով, որ իր ասածին հասնելու համար պետք է աշխատանք տարվի, գործ արվի, Հայաստանին առաջարկներ ներկայացվեն:
Հայաստանը զարգացնելու, հայ ժողովրդին օգնելու համար, ըստ Սերխիո Նահապետյանի, պետք է ռեսուրսներ ներդնեն և՛ հայաստանյան իշխանությունները՝ Հայաստանը, և՛ սփյուռքը: «Այն մարդիկ, ովքեր դրամ են դնում Հայաստանում, բարեգործական կազմակերպություններ չեն, նրանք բիզնես են դնում: Պետք է նախ հասկանամ, որ իրենց դրամն ապահով տեղում է, և բիզնեսն առաջ է գնալու: Եթե առաջ չգնա, դժվարություններ ունենան, ապա կգնան այլ երկրում իրենց բիզնեսը զարգացնելու, այնտեղից էլ փող կուղարկեն՝ որպես բարեսիրություն: Բայց դա խնդրի լուծում չէ: Աշխատանք պետք է լինի երկրում»,- ասաց նա:
Արգենտինահայը նշեց, որ հիմա սփյուռքը կանգնած է մարտահրավերի առջև. երիտասարդներն առավել քիչ են հետաքրքրված հայկական խնդիրներով: «Պետք է դա փոխվի: Պետք է աշխատենք նոր սերնդի հետ, պետք է աշխատենք մեր երիտասարդների, պրոֆեսիոնալների հետ և նրանց ներգրավենք կազմակերպություններում: Նրանք պետք է առաջարկներ բերեն»,- ասաց նա՝ նշելով, որ քաղաքական կառույցները պետք է այդ երիտասարդների միջոցով սփյուռքյան նոր հանձնախմբեր բացեն:
Այնուամենայնիվ, ըստ սփյուռքահայ գործչի, Հայաստան-սփյուռք կապը տարիների ընթացքում ամրանում է, պե՛տք է ամրանա: «Բայց ես միշտ ասում եմ՝ սփյուռքի հայը կարծում է, որ Հայաստանը «Disney land» պիտի լինի՝ գեղեցիկ, աղքատություն չպիտի լինի, այդպես են մտածում, որովհետև Հայաստանը մեզ համար երազ է: Այդ կապերը պետք է ամրացնենք, և սփյուռքը պետք է իմանա, որ Հայաստան երկիր ունենք, որ խնդիր ունի, որ ժողովուրդ ունենք, որ իր ցավերն ունի, որ աղքատն էլ կա, գողն էլ կա, լավ մարդն էլ կա, հարուստն էլ կա և այլն, և այլն: Այս խնդրին երբեք չեն անդրադարձել, և կարծում են, որ Հայաստանը դրախտ է: Ո՛չ, այդպես չէ»,- ասաց նա:










