Ռուսաստանում դատարանը դեռահասի վրա հարձակված առյուծին հայ սեփականատիրոջից վերցնելու որոշում է կայացրել
ՌԴ Սարատովի մարզի Էնգելսի շրջանային դատարանը երկուշաբթի տեղի բնակչից առյուծին վերցնելու որոշում է կայացրել, որն ավելի վաղ հարձակվել էր 15-ամյա դեռահասի վրա, հայտնում է «ՌԻԱ Նովոստի»-ն:
Առյուծի հարձակումը դպրոցականի վրա տեղի էր ունեցել Էնգելս քաղաքում ապրիլի 24-ին: Տղան տեղափոխվել էր հիվանդանոց, նա ստացել էր թեթև քերծվածքներ: Քաղաքի դատախազությունը դատարանով պահանջել է առգրավել կիսաազատ պայմաններում գտնվող Մայա մականունով առյուծին իր հայ սեփականատեր Եղիշ Երոյանից:
«Դատարանը որոշել է արգելել Երոյանին տանն առյուծ պահել և առգրավել է այն… Դատարանի որոշումը ենթակա է անհապաղ կատարման»,- ասել է դատավոր Նատալյա Սավենկովան:
«Վայրի կենդանուն ման էին տալիս փողոցում, ինչը չի համապատասխանում սանիտարական նորմերին և անվտանգության կանոններին»,- ТАСС լրատվամիջոցին հայտնել են դատարանի մամուլի ծառայությունից:
Այժմ առյուծին կարող են ուղարկել Սարատովին ամենամոտ գտնվող Պենզա քաղաքի կենդանաբանական այգի:










