ԱԺ-ն առաջին ընթերցմամբ ընդունեց պետական գույքի մասնավորեցման նոր նախագիծը, ընդունվեց նաև համայնքների խոշորացման նախագիծը

16:46 • 08.06.17

Ազգային ժողովն առաջին ընթերցմամբ ընդունեց «Պետական գույքի մասնավորեցման 2017-2020 թվականների ծրագրի մասին» նախագիծը՝ 57 կողմ, 21 դեմ, 0 ձեռնպահ քվեարկությամբ:

Վարման կարգով ձայն խնդրեց «Ելք» դաշինքի պատգամավոր Արտակ Զեյնալյանը, ով հայտարարեց, թե գործուղման մեջ գտնվող պատգամավորների քվեարկությունը չի կարող օգտագործվել:  

Հիշեցնենք, որ նախագծով առաջարկվում էր մասնավորեցնել 47 ընկերություն, որոնցից 23-ը՝ սեփականաշնորհման նախկին ծրագրով: Ընկերությունների վաճառքից պետությունն ակնկալում է ստանալ 35-36 մլրդ դրամ:  

ԱԺ-ն ընդունեց նաև «ՀՀ վարչատարածքային բաժանման մասին» ՀՀ օրենքում փոփոխություններ և լրացումներ կատարելու մասին և «Տեղական ինքնակառավարման մասին» ՀՀ օրենքում փոփոխություններ և լրացումներ կատարելու մասին նախագծերը` 57 կողմ, 23 դեմ, 0 ձեռնպահ քվեարկությամբ:

Դեմ քվեարկեց «Ծառուկյան» դաշինքը, «Ելքը» չմասնակցեց քվեարկությունը:

Նախագծով նախատեսում է ՀՀ 8 մարզերում 34 խոշորացված համայնք ձևավորել՝ 328 համայնքների միավորման արդյունքում։ Նախորդ օրենսդրական նախաձեռնությամբ արդեն իսկ 18 խոշորացված համայնքներ կան, որոնց մեջ ներառվել են 140 համայնքներ: