ԵԱՀԿ ՄԽ համանախագահները մտադիր են Հայաստան այցի ընթացքում հստակեցնել իրավիճակը ԼՂ հակամարտության գոտում. Զախարովա
ԵԱՀԿ Մինսկի խմբի համանախագահները պատրաստվում են Հայաստան այցի ընթացքում հստակեցնել իրավիճակը Լեռնային Ղարաբաղի հակամարտության գոտում: Այդ մասին ճեպազրույցի ժամանակ հայտարարել է Ռուսաստանի ԱԳՆ պաշտոնական ներկայացուցիչ Մարիա Զախարովան:
Զախարովան նշել է, որ Հայաստան հունիսի 10-ին համանախագահների այցի ընթացքում նախատեսվում է Լեռնային Ղարաբաղի հակամարտության կարգավորման ակտուալ հարցերի քննարկում:
«Ավելի վաղ ձեռքբերված պայմանավորվածության համաձայն՝ հունիսի 10-ին ԵԱՀԿ Մինսկի խմբի համանախագահները կլինեն Հայաստանում, որտեղ նրանք հանդիպում կունենան երկրի նախագահի, արտգործնախարարի և պաշտպանության նախարարի հետ: Նրանք մտադիր են հստակեցնել հակամարտության գոտում իրավիճակը, նախատեսվում է Լեռնային Ղարաբաղի հակամարտության կարգավորման ակտուալ հարցերի քննարկում, այդ թվում՝ հաշվի առնելով ապրիլի վերջին Մոսկվայում Ռուսաստանի, Ադրբեջանի, Հայաստանի արտգործնախարարների հանդիպումը»,- ասել է Ռուսաստանի ԱԳՆ պաշտոնական ներկայացուցիչը:
Զախարովան հավելել է նաև, որ նախատեսվում է համանախագահների այցը Լեռնային Ղարաբաղ, իսկ մեկ շաբաթ անց՝ Բաքու: Տարածաշրջան այցի արդյունքներով հրապարակվելու է համապատասխան հայտարարություն:
«Նախատեսվում է նաև այցելություն Լեռնային Ղարաբաղ: Ռուսաստանը ներկայացնելու է հատուկ հանձնարարություններով դեսպան և ԵԱՀԿ Մինսկի խմբի համանախագահ Իգոր Պոպովը, մեկ շաբաթ անց համանախագահների եռյակը պետք է թռչի Բաքու և, համաձայն ձևավորված պրակտիկայի, ԵԱՀԿ-ի կայքում կհրապարակվի համապատասխան հայտարարություն»,- ասել է ՌԴ ԱԳՆ խոսնակը:










