Հայաստանը շարունակում է հետաքրքրված լինել ԱՄՆ-ի և ՆԱՏՕ-ի՝ առաջիկայում անցկացվելիք այլ վարժանքներով, ինչը մենք ողջունում ենք. ԱՄՆ դեսպանատուն

18:48 • 05.09.17

Tert.am-ը մեկնաբանություն էր խնդրել Հայաստանում Ամերիկայի Միացյալ Նահանգների դեսպանությունից՝ Հայաստանի՝ Վրաստանում անցկացվող վրաց-ամերիկյան Agile Spirit 2017 զորավարժություններին չմասնակցելու վերաբերյալ:

Մասնավորապես Tert.am-ի հարցին, թե ինչ են կարծում, արդյո՞ ք ՆԱՏՕ-ի զորավարժությանը Հայաստանի չմասնակցելը, ինչպես ՀՀ-ում ԱՄՆ դեսպան Ռիչարդ Միլսն էր ասել, Հայաստանի՝ ինքնուրույն որոշումներ կայացնել չկարողանալու դրսևորում չէր, ԱՄՆ դեսպանատնից պատասխանել են․«Ուրախ ենք, որ Հայաստանը հետզհետե ավելացնում է իր մասնակցությունը ԱՄՆ հովանու ներքո ՆԱՏՕ-ի գործընկերների հետ՝ հատկապես այս տարածաշրջանում անցկացվող վարժանքներին: Վերջերս Հայաստանը մասնակցեց Վրաստանում անցկացվող Noble Partner վարժանքին, որը թույլ տվեց զարգացնել ռազմաբժշկական պատրաստականությունը՝ որպես ՆԱՏՕ-ի միջազգային խաղաղապահ առաքելությունների «Դեր 2» ռազմաբժշկական ստորաբաժանում: Հայկական «Դեր 2» ռազմաբժշկական թիմը Noble Partner վարժանքի ընթացքում ապահովում էր 7 երկրներից վարժանքին մասնակցող ավելի քան 2000 զինծառայողների բուժսպասարկումը:

Ինչ վերաբերում է Agile Spirit գործողությանը, ապա չմասնակցելու վերաբերյալ որոշման մասին տեղեկություններ կարող եք ստանալ Պաշտպանության նախարարությունից: Պաշտպանության նախարարությունը շարունակում է հետաքրքրված լինել ԱՄՆ-ի և ՆԱՏՕ-ի հովանու ներքո առաջիկայում անցկացվելիք այլ վարժանքների մասնակցությամբ, որոնք հնարավորություն կտան ապահովել ռազմաբժշկական ու ինքնաշեն պայթուցիկների վնասազերծման հայկական ստորաբաժանումների հավաստագրումը: Մենք պատրաստ ենք աջակցել և ողջունում ենք Հայաստանի մասնակցությունը ԱՄՆ հովանու ներքո առաջիկայում անցկացվելիք համապատասխան վարժանքներին»:

Հիշեցնենք, որ Վրաստանում սեպտեմբերի 3-ին մեկնարկած ՆԱՏՕ-ի Agile Spirit 2017 զորավարժություններին Հայաստանը չի մասնակցում: Վրաստանի պաշտպանության նախարարության հանրային կապերի պատասխանատու Գիորգի Կաջարավան Tert.am-ի հետ զրույցում նշել էր, Հայաստանը վերջին պահին հրաժարվել է մասնակցությունից: Հայկական կողմից էլ ՊՆ փոխնախարար Արտակ Զաքարյանը նշել էր, որ Հայաստանը պաշտոնապես չի հաստատել, որ մասնակցելու է Ախալցխայում Վրաստանի և ԱՄՆ-ի կազմակերպած զորավարժություններին։