Թուրքիայում հայկական եկեղեցիների պահպանումը կախված է մեր համայնքի կազմակերպվածությունից. Սելինա Դողան
Թուրքիայի Ժողովրդահանրապետական կուսակցության հայազգի պատգամավոր Սելինա Դողանն անդրադառնալով Թուրքիայում՝ Դիարբեքիրի Սուր պատմական շրջանում թուրքական իշխանությունների կողմից հնագույն պատմական կոթողների ավերմանը՝ նշեց, որ իրենք ցավում են, որ ոչնչացվում է Թուրքիայում ապրող ժողովուրդների պատմությունը:
Նա Tert.am-ի հետ զրույցում նշեց. «Սուրը Անատոլիայի պատմությունն է և մեր բոլորի ընդհանուր հիշողությունը: Դժբախտաբար, Թուրքիայի իշխող «Արդարություն և զարգացում» կուսակցությունը (ԱԶԿ) նպատակ է դրել ոչնչացնել Թուրքիայում ապրող ժողովուրդների պատմությունը և ստեղծել նոր՝ Իսլամիզմի վրա հիմնված պատմություն»:
Հիշեցնենք, որ Սուրում արդեն երկրորդ ամիսն է, ինչ ամբողջությամբ քանդվում են թուրք-քրդական բախումներից հետո պետականացված կառույցները: Հայտնի է, որ այս հատուկ գործողության ընթացքում կավերվի, ընդհանուր առմամբ, 850 կառույց:
Նշենք, որ 2016թ.-ին պետականացված գույքի ցուցակում էր հայտնվել նաև հայկական Սուրբ Կիրակոս եկեղեցին, որը, սակայն, ավելի ուշ հաջողվեց վերադարձնել մշակութային հիմնադրամին, որին եկեղեցին պատկանում էր մինչ բռնի պետականացումը:
Սելինա Դողանը նկատեց՝ Սուրը միակը չէ, և ոչ էլ վերջին տարածքը, որի ինքնությունը Թուրքիայում փոխվում է: «Դրանում կասկած չկա․ այնտեղ ապրած կամ ապրող հայերը, քրդերը և այլ ազգերն են այդ մասին վկայում: Այն շատ սիմվոլիկ տարածք է, բայց պետք է նկատել՝ թուրքական իշխանություններն անում են նույն բանը ամբողջ Թուրքիայում»,- նշեց նա:
Թուրքիայի խորհրդարանի հայազգի պատգամավորի խոսքով՝ Թուրքիան նման քաղաքականություն է վարում նաև կրթության ոլորտում: Ըստ նրա՝ հիմա նոր ուսումնական ծրագրով թուրքական իշխանությունները ստեղծում են ոչ թե Թուրքիայի, այլ «Արդարություն և զարգացում» կուսակցության պատմությունը:
«Շատ դպրոցներ իսլամացված են: Հակառակ սահմանադրության սկզբունքներին՝ Թուրքիան այլևս աշխարհիկ երկիր չէ: Մյուս կողմից էլ՝ Թուրքիայի Արևելքում շատ թեժ հակամարտությունը և պայքարը ահաբեկչության դեմ շատ խաղաղ բնակիչների կյանք խլեց: Ցավոք, այդ դեպքերից և ոչ մեկը չի հետաքննվում: Եվ երկար տևող հակամարտության մթնոլորտը հազարավոր մարդկանց ստիպել է լքել իրենց տները: Այսքան տրավմատիկ շրջանից հետո էլ հիմա մարդիկ առերեսվում են «քաղաքների նորացման» հետ»,- նշեց նա:
Սելինա Դողանը պատմեց, որ Սուրի բնակիչներին թուրքական իշխանությունները տվել են շատ ցածր գին նրանց տների դիմաց: «Սա մի կողմից մարդկանց իրավունքների խախտում է, մյուս կողմից՝ մշակութային կոտորած»,- ասաց նա՝ ուշադրություն հրավիրելով այն հանգամանքի վրա, որ այս օրերին ոչնչացվում է նաև քրդական քաղաք Հասանքեյֆը, որը հնագույն պատմական ժառանգություն է:
«Արդյունքում՝ հարստություն համարվող հայկական եկեղեցիների և այլ նման պատմական հուշարձանների պահպանումը կախված է նրանից, թե ԱԶԿ-ն որքան երկար կմնա իշխանությունում և թե մեր համայնքը որքան կազմակերպված կլինի իր իրավունքները պաշտպանելու հարցում»,- ասաց նա՝ մատնանշելով, որ, օրինակ, ասորական համայնքների սեփականությունը թուրքական գանձապետարանի կողմից 1․5 ամիս առաջ առգրավվեց:










