«Իրմա» փոթորկի հետևանքով Մայամիի կենտրոնական փողոցները ջրի տակ են հայտնվել (տեսանյութեր, լուսանկարներ)

12:46 • 11.09.17

Օգտատերերը համացանցում են տեղադրել տեսանյութեր, որոնցում երևում է՝ ինչպես են ԱՄՆ Ֆլորիդա նահանգի Մայամի քաղաքի կենտրոնական փողոցները հայտնվել ջրի տակ, հայտնում է dailycaller.com–ը:


«Իրմա» փոթորկի պատճառով քաղաքի կենտրոնն ամբողջությամբ հայտնվել է ջրի տակ:


Քամու ուժգնությունը հասել է ժամում 175 կիլոմետրի: Քաղաքի որոշ հատվածներում ջուրը հասել է 60 սանտիմետրի:


Ուժեղ քամու և անձրևի հետևանքով մոտ 4 միլիոն մարդ մնացել է առանց էլեկտրականության:


Չնայած նահանգից հեռանալու խորհրդին՝ շատ բնակիչներ մնացել են տանը:


Սոցիալական մեդիաներում հրապարակված տեսանյութերը ցույց են տալիս, թե ինչպես է Բրիքել պողոտան, որը հայտնի է որպես Հարավային Ֆլորիդայի Ուոլ սթրիթ, վերածվել գետի:


Ցնցող տեսանյութերից մեկն էլ ցույց է տալիս ջրով շրջապատված Մայամիի խանութներից մեկը:


Նշենք, որ «Իրմա» փոթորիկը վերջին պահին փոխել է իր ուղղությունը: Օրեր շարունակ օդերևութաբանները նախազգուշացրել են, որ փոթորիկն ուղղվում է դեպի Մայամի, բայց հետո փոթորիկը կտրուկ շեղվել է դեպի արևմուտք՝ Մայամիի փոխարեն ուղղվելով Տամպա-Սենթ Փիթերսբերգ: Այնուամենայնիվ, չնայած նրան, որ Մայամին չի հայտնվել փոթորկի գլխավոր հարվածի տակ՝ այն իր ավերածություններն է գործել այնտեղ:


ԱՄՆ փոթորիկների ազգային կենտրոնը հայտնել է, որ երկուշաբթի առավոտյան փոթորկի ուժգնությունը նվազել է՝ հասնելով 1-ին մակարդակի: Փոթորիկը շարունակում է կորցնել ուժը և շարժվում է Տամպա քաղաքից հյուսիս: