ԱԺ-ն քննարկում է «Մեղրի-Նորդուզ սահմանային դարպասի համատեղ օգտագործման մասին» համաձայնագիրը (ուղիղ)
ԱԺ-ն քննարկում է ՀՀ կառավարության և Իրանի Իսլամական Հանրապետության կառավարության միջև «Մեղրի-Նորդուզ սահմանային դարպասի համատեղ օգտագործման մասին» համաձայնագիրը:
Նախագծով առաջարկվում է վավերացնել 2016 թվականի դեկտեմբերի 21-ին Երևանում ստորագրված «Հայաստանի Հանրապետության կառավարության և Իրանի Իսլամական Հանրապետության կառավարության միջև` Մեղրի-Նուրդուզ սահմանային դարպասի համատեղ օգտագործման մասին» համաձայնագիրը, որով նախատեսվում է էլ ավելի մատչելի և դյուրին դարձնել Մեղրի և Նուրդուզ մաքսային անցակետերում կատարվող ծառայությունները` ուղևորների, ապրանքների և տրանսպորտային միջոցների միջազգային փոխադրումների հետ կապված:
Ըստ համաձայնագրի` Կողմերը ջանքեր կգործադրեն` խուսափելու համար մաքսային հսկողության կրկնակի գործողություններից` դյուրացնելու համար օրինական առևտուր և տարանցիկ փոխադրումները, ինչպես նաև կձեռնարկվի համատեղ միջոցներ արդյունավետ մաքսային հսկողության իրականացման և ապրանքները բաց թողնելու համար ծախսվող ժամանակի կրճատման ուղղությամբ:
Հիմնական զեկուցող, Պետական եկամուտների կոմիտեի նախագահի տեղակալ Վախթանգ Միրումյանը տեղեկացրեց, որ համաձայնագիրը ստորագրվել է 2016թ-ի դեկտեմբերի 21-ին Երևանում և նպատակը 2 երկրների միջև փոխադարձ առևտրի դյուրացումն է և մաքսային ընթացակարգերի պարզեցումը:
Միրումյանին հարց ուղղեց «ԵԼՔ» խմբակցության ղեկավար Նիկոլ Փաշինյանը, ով, կարևորելով Իրանի հետ հարաբերությունների խորացումը, հետաքրքրվեց Մեղրի ՀԷԿ-ի շինարարությունից: Նա հիշեցրեց, որ ՀԷԿ-ի հիմնօրհնեքը կատարվել է 2012թ-ին, և մինչ օրս որևէ հայտարարություն և շարունակություն չի տրվել գործին:
«Դա հիմք է տալիս ենթադրել, որ չի կառուցվել, չի կառուցվելու»,-ասաց նա:
Վախթանգ Միրումյանը նշեց, որ շինարարության վերաբերյալ տեղեկության չի տիրապետում և կարող է ճշտել, հետո պատասխանել:
Ինչ վերաբերում է համաձայնագրին, ապա ասաց, որ հետևողական են լինելու և համաձայնել են ծրագիրը իրականացնել:
«Իրանի Իսլամական Հանրապետության խորհրդարանում համաձայնագիրն արդեն վավերացվել է, գործողությունների ծրագիրը սկսված է և իրականացվելու է»,-ասաց նա:
Նիկոլ Փաշինյանն արձագանքեց, որ միակը չէ, որ տեղեկություն չունի Մեղրի ՀԷԿ-ի շինարարության մասին:










