«Տաքսի» ֆիլմի աստղը Ղրիմ այցելելուց հետո հայտնվել է ուկրաինական «Միրոտվորեց» կայքի ցանկում
Հանրահայտ ֆրանսիացի դերասան Սամի Նասերին, ով առավել հայտնի է «Տաքսի» ֆիլմում գլխավոր դերակատարմամբ, ընդգրկվել է ուկրաինական «Միրոտվորեց» կենտրոնի տվյալների բազայում, ինչի համար պատճառ է հանդիսացել նրա այցելությունը Ղրիմ:
«Ուկրաինայի պետական սահմանի գիտակցաբար խախտում՝ Ռուսաստանի օկուպացրած Ղրիմ ներխուժելու մտադրությամբ», Корреспондент-ի փոխանցմամբ՝ որպես մեկնաբանություն նշվում «Միրոտվորեցի» կայքում:
Կայքը հիշեցնում է, որ Նասերին «բազմիցս դատապարտվել է ծեծկռտուքների մասնակցելու և ոչ սթափ վիճակում մեքենա վարելու համար»:
Այս գիշեր դերասանը ժամանել է Սիմֆերոպոլի, որտեղ նրան դիմավորել են լրագրողները, երկրպագուներն ու տաքսիստները: Դերասանը կմասնակցի Յալթայում անցկացվելիք Խաղաղության համաժողովին:
Նշենք, որ «Միրոտվորեցի» կայքում պարբերաբար հայտնվում են ռուս և այլազգի գործիչներ, որոնք Ղրիմ են այցելում Ռուսաստանից և ում գործունեությունը, ըստ կենտրոնի, սպառնալիք են ներկայացնում Ուկրաինայի ազգային անվտանգությանը:










