Կատալոնիայի իշխանությունները հանրաքվեին մասնակցությունը որոշելիս սխալ են թույլ տվել. El Mundo

16:07 • 02.10.17

Կատալոնիայի իշխանություններն Իսպանիայից անկախանալու հարցով հանրաքվեի ավելի քան 100 տոկոս մասնակից են հաշվել, հայտնում է իսպանական El Mundo թերթը՝ վկայակոչելով ինքնավար շրջանի իշխանությունների տվյալները:


Կատալոնիայի կառավարության պաշտոնական ներկայացուցիչ Ժորդի Տուրուլը հայտարարել է, որ Իսպանիայից Կատալոնիայի անկախացման օգտին քվեարկել է հանրաքվեին մասնակցածների 90,09 տոկոսը, դեմ է քվեարկել կատալոնացիների 7,87 տոկոսը: Չլրացված է մնացել 2,03 տոկոս քվեաթերթիկ և ևս 0,89 տոկոս քվեաթերթիկ անվավեր է ճանաչվել:


Թերթն ուշադրություն է հրավիրել այն փաստի վրա, որ ներկայացված թվերի գումարը կազմում է 100,88 տոկոս, ինչը գերազանցում է առավելագույն հնարավոր թիվը: Թերթը նշում է, որ նման անհամապատասխանության պատճառ է հավանաբար դարձել սովորական թվաբանական սխալը, որը թույլ է տրվել տոկոսների որոշման ժամանակ։


Հանրաքվեն անցկացվել է հոկտեմբերի 1-ին և ուղեկցվել է իրավապահ մարմինների հետ հանրաքվեի խաղաղ մասնակիցների բախումներով: Մադրիդը չի ճանաչում հանրաքվեի օրինականությունը: Հաղորդվել է, որ բախումների ընթացքում վիրավորվել է հանրաքվեի 844 մասնակից և 33 ոստիկան: