Իրաքյան Քրդստանի անկախության հանրաքվեից հետո Էրբիլն ու Բաղդադն առաջին անգամ փորձել են բանակցել

11:51 • 08.10.17

Իրաքյան Քրդստանի անկախության հանրաքվեից հետո պաշտոնական Բաղդադն ու Քրդստանի ղեկավարությունը հանդիպում են ունեցել Սուլեյմանիյե քաղաքում, այս մասին հաղորդում է nerinaazad.net կայքը:

Հաղորդվում է, որ Իրաքյան Քրդստանի ղեկավար Մասուդ Բարզանիի և Իրաքի փոխնախագահներ Իյադ Ալավիի ու Ուսամե Նուջեյֆիի հետ մեկտեղ հանդիպմանը մասնակցել են նաև Իրաքից որոշ պատգամավորներ:

Հանդիպումից հետո Նուջեյֆին լրագրողների հետ զրույցում շեշտել է, որ կողմերը ցանկություն ունեն խնդիրները լուծել բանակցությունների միջոցով՝ դուրս չհանելով այն Իրաքի սահմաններից: 

«Կողմերը պետք է փորձեն հասկանալ միմյանց, Իրաքյան Քրդստանը չի կարող պատժվել շրջափակման մեջ դրվելով», - ասել է Իրաքի փոխնախագահը:

Հիշեցնենք, որ սեպտեմբերի 25-ին Իրաքյան Քրդստանում տեղի ունեցած անկախության հարցով հանրաքվեին մասնակցած քաղաքացիների 93.29 տոկոսն «այո» է ասել անկախացմանը: Հանրաքվեին մասնակցել է ընտրողների 72,16 տոկոսը:

Իրաքի վարչապետ Հայդեր ալ Աբադին հանրաքվեն անվանել է հակասահմանադրական և հայտարարել է, որ Իրաքն այն չի ընդունելու: Իրաքի իշխանությունները նաև հայտարարել են, որ բանակցություններ չեն վարելու Քրդստանի շրջանային կառավարության հետ քվեարկության արդյունքների վերաբերյալ: Հանրաքվեի անցկացման դեմ են հանդես եկել Թուրքիան և Իրանը, ինչպես նաև ԱՄՆ-ն և ՄԱԿ-ը: