Մհեր Ենոքյանի փոքրիկ հաղթանակը դատական համակարգի անկախացման ազդանշան է. Աղվան Վարդանյան

11:26 • 09.10.17

ԱԺ «Հայ Յեղափոխական Դաշնակցություն» խմբակցության քարտուղար Աղվան Վարդանյանի համար շաբաթվա կարևոր իրադարձությունը ցմահ դատապարտված Մհեր Ենոքյանի՝ դատարանում տարած փոքրիկ  հաղթանակն էր: Նա ԱԺ ճեպազրույցների ժամին նկատեց, որ Մհեր Ենոքյանն արդեն 21 տարի է, ինչ կրում է պատիժը:

«21 տարվա ընթացքում Մհեր Ենոքյանը դատարանում ունեցավ փոքրիկ հաղթանակ, ինչը պայմանավորված է տվյալ դատավորի մարդ լինելով: Ես հավատում եմ, որ ի վերջո Մհեր Ենոքյանի ճակատագրում փոփոխություն կլինի: Սա ուշագրավ միջադեպ է, փոփոխությունների սկիզբ է»,- ասաց նա:

Վարդանյանը Մհեր Ենոքյանի` դատարանում տարած հաղթանակում նաև այլ իմաստ է տեսում: Նրա գնահատմամբ՝ սա ազդանշան է, որ ՀՀ պետաիրավական համակարգում  փոփոխությունների հիմք է դրվում:

«Ցմահ դատապարտյալը նույնպես ասում է, որ սա դատական համակարգի անկախացման սկիզբն է»,- շարունակեց նա՝ նկատելով, որ լրատվամիջոցներն այս հարցին ուշադրություն չդարձրեցին:

Նշենք, որ դատարանն օրերս «Նուբարաշեն» ՔԿՀ-ի վարչակազմին պարտավորվել է վերացնել Մհեր Ենոքյանի տեսակցությունների սահմանափակումը:

Հիշեցնենք՝ 20 տարեկանում` 1996 թ-ին, Մհեր Ենոքյանը դատապարտվել է մահապատժի` մեղադրվելով համակուրսեցու`սպանության մեջ /ՀՀ Քր.Օր.-ի 99-րդ հոդվածի 1-ին և 6-րդ կետեր/:

ՀՀ նախագահի 2003 թ-ի հրամանագրով` ի թիվս 41 մահապատժի դատապարտվածների, պատիժը փոխարինվել է ցմահ ազատազրկման: Ենոքյանն իրեն մեղավոր չի ճանաչել դատարանում, տվել միևնույն ցուցմունքները, թե փորձել է կանխել սպանությունը` մինչ մյուս ընկերը փորձում էր սպանել նրան:

ՀեղինակԱնի Օհանյան