Համոզված եմ՝ ՀՀ-ն 2018թ. գարուն կմտնի առանց հայ-թուրքական անհեռանկար ու սպառված արձանագրությունների. Աղվան Վարդանյան

20:00 • 10.10.17

Խորապես համոզված եմ, որ Թուրքիան որևէ բան չի անելու հայ-թուրքական արձանագրությունը վավերացնելու համար, և մենք 2018թ.-ի գարուն մտնելու ենք առանց այդ անիմաստ, անհեռանկար, սին արձանագրությունների. Tert.am-ի հետ զրույցում ասաց ԱԺ «Հայ Յեղափոխական Դաշնակցություն» խմբակցության քարտուղար Աղվան Վարդանյանը, ով համոզված է, որ ՀՀ նախագահի հայտարարությունը չի մղի Թուրքիային, որ ստորագրի արձանագրությունները:

Հիշեցնենք, որ 8 տարի առաջ՝ 2009թ.-ի հոկտեմբերի 10-ին Ցյուրիխում ստորագրվեցին հայ-թուրքական արձանագրությունները, որոնք այդպես էլ չվավերացվեցին և կյանքի չկոչվեցին։ Նախագահ Սերժ Սարգսյանը 2017թ. սեպտեմբերի 20-ին ՄԱԿ-ի գագաթնաժողովին հայտարարեց, որ եթե Թուրքիան մինչև գարուն չվավերացնի Ցյուրիխյան արձանագրությունները, ապա դրանք առ ոչինչ կհայտարարվեն մեր կողմից:

Ըստ Աղվան Վարդանյանի՝ Թուրքիայի այսօրվա ղեկավարությունը որևէ քայլ չի անելու այս ուղղությամբ:

«Մոտենում է այն խելամիտ ժամկետը, որի մասին հանրապետության նախագահը պարբերաբար ասել է։ Մենք ունենք հստակ պետական դիրքորոշում, որը, կարծում եմ, նույն «Դաշնակցության» դիրքորոշումն է, որն ի վերջո դարձավ Սահմանադրական դատարանի որոշում: Եվ ակնհայտ է, որ առնվազն Թուրքիայի այսօրվա ղեկավարությունը որևէ քայլ չի անելու այս ուղղությամբ: Շատերն ասում են, որ նախագահի այս ելույթը նրա համար էր, որ շահագրգռի Թուրքիային, կամ Եվրոպան, ԱՄՆ-ն փորձեն Թուրքիայի հետ աշխատել, որ Թուրքիան առաջ գնա, սակայն մենք հաճախ փաստերը մոռանում ենք»,-հավելեց Վարդանյանը։