Պաղեստինցի կանայք դատի են տվել իսրայելական ավիաընկերություններին՝ օդանավակայանում զննման ժամանակ իրենց մերկացնելու համար
Երեք պաղեստինցի կանայք, որոնք անցած հոկտեմբերին դեպի Թել Ավիվ իրականացվող չվերթից առաջ Սերբիայի մայրաքաղաք Բելգրադի օդանավակայանում մերկացվել են զննման ժամանակ, դատի են տվել իսրայելական ElAl և Arkia ավիաընկերություններին: Կանանց խոսքով՝ օդանավակայանի անվտանգության աշխատակիցները ոչ միայն ամբողջությամբ զննել են իրենց մարմինները, այլ նաև ենթարկել սեռական ոտնձգությունների: Այս մասին հայտնում է Al Jazeera-ն:
Իսրայելի քաղաքացիների խոսքով՝ իրենց ստորացումները տևել են ավելի քան 2 ժամ. իրենց սպառնացել են, որ չեն թողնի մտնել ինքնաթիռի սրահ, մինչև իրենք ամբողջությամբ չմերկանան զննման համար:
«Ես չէի կարողանում ոչ մի բառ ասել: Ամբողջությամբ մերկ եմ եղել գոտկատեղից վերև, սա ցավ է պատճառել ինձ»,- պատմել է տուժածներից մեկը:
Նշվում է, որ զննման ժամանակ կանանցից մեկն ամոթից և սթրեսից կորցրել է գիտակցությունը:
Երեք կանանց շահերը ներկայացնող փաստաբան Ավնի Բանայի պնդմամբ՝ նրանց ստիպել են մերկանալ բացառապես ազգության պատճառով, մինչդեռ կանանց հանդեպ ոչ մի իրական կասկած լինել չէր կարող:
Աղբյուրը մանրամասնում է, որ կանայք որոշել են մեկնել Բելգրադ հանգստանալու նպատակով՝ Երուսաղեմի եբրայական համալսարանում մագիստրոսական աստիճանի ուսուցումը վերսկսելուց առաջ: Նրանք ձեռք են բերել տոմսերն Arkia ավիաընկերությունից, սակայն բոլոր իսրայելական ավիաընկերությունների անվտանգության ստուգումներն իրականացնում է El Al ավիաընկերությունը, այդ թվում՝ դեպի Իսրայել մեկնող չվերթների դեպքում:
Մեղադրվող կողմի պաշտպանությունը պետք է մինչև հոկտեմբերի 20-ը պատասխանի մեղադրանքներին, ինչից հետո դատավարության օր կնշանակվի Թել Ավիվում:










