Եվրահանձնակատար Յոհանես Հանի այցը Բելառուս անսպասելիորեն հետաձգվել է
ԵՄ հարևանության և ընդլայնման հարցերով հանձնակատար Յոհանես Հանի այցը Բելառուս, որը պետք է կայանար հոկտեմբերի 17-ին, տեղափոխվել է: Այդ մասին հայտնել է Բելառուսի ԱԳՆ մամուլի քարտուղար Դմիտրի Միրոնչիկը, հաղորդում է «ՌԻԱ Նովոստի»-ն:
Ավելի վաղ Բելառուսում ԵՄ ներկայացուցչության մամուլի ծառայությունից հայտնել են, որ Հանը հոկտեմբերի 17-ին այցի ընթացքում կհանդիպի երկրի նախագահ Ալեքսանդր Լուկաշենկոյի և արտգործնախարար Վլադիմիր Մակեյի հետ՝ առաջիկա «Արևելյան գործընկերության» գագաթնաժողովի առաջնահերթությունները և ԵՄ-ի ու Բելառուսի միջև հարաբերությունների զարգացման հեռանկարները քննարկելու համար:
«Մենք ԵՄ-ի ներկայացուցչությունից ստացել ենք ծանուցում, որ ԵՄ հարևանության և ընդլայնման հարցերով հանձնակատար Հանի այցը Մինսկ հետաձգվում է՝ հաջորդ շաբաթ Եվրոպական խորհրդի նիստի նախաշեմին անսպասելի, բայց շատ կարևոր նախապատրաստական հանդիպումների առնչությամբ»,- ասված է Միրոնչիկի մեկնաբանությունում:
Հաղորդագրությունում նշվում է նաև, որ Մինսկում ափսոսանք են հայտնում այցի հետաձգման առնչությամբ:
«Բելառուսական կողմը հետաքրքրված է Եվրամիության հետ համագործակցության շարունակմամբ և զարգացմամբ»,- հավելել է մամուլի քարտուղարը:










