Անդրիաս Ղուկասյանը կմնա կալանքի տակ. կալանքը գրավով փոխարինելու միջնորդությունը մերժվեց
Էրեբունի և Նուբարաշեն վարչական շրջանների ընդհանուր իրավասության դատարանում շարունակվում է «Ոտքի Հայաստան» քաղաքացիական նախաձեռնության համակարգող Անդրիաս Ղուկասյանի դատավարությունը՝ դատավոր Վարդան Գրիգորյանի նախագահությամբ:
Նախորդ դատական նիստին Անդրիաս Ղուկասյանը կալանքը գրավով փոխարինելու միջնորդություն էր ներկայացրել։
Անդրիաս Ղուկասյանը շեշտեց, որ արդեն կալանքի տակ է գտնվում 1, 2 տարի, սակայն քրեական գործով նշված ապացույցներով նրան կալանքի տակ պահելու հիմքեր չկան:
«Միջնորդում եմ դատարանին կալանքը 1,5 մլն ՀՀ դրամով գրավով փոխարինել կամ սահմանել գրավի մեկ այլ՝ ողջամիտ չափ»,-նախորդ նիստին հայտնեց Անդրիաս Ղուկասյանը։
Մեղադրող դատախազ Պետրոս Պետրոսյանն առարկել էր միջնորդությանը` համարելով, որ այն անհիմն է։
Դատարանն այսօր հրապարակեց միջնորդության վերաբերյալ որոշումը` մերժելով այն։
Ադրիաս Ղուկասյանը կմնա կալանքի տակ։
Հիշեցնենք, որ Ղուկասյանին մեղադրանք է առաջադրվել 2016թ. հուլիսի 29-ին Երևան քաղաքում զանգվածային անկարգություններ կազմակերպելու, հուլիսյան դեպքերի ժամանակ Մ. Խորենացի փողոցում ՀՀ ՊՊԾ գնդի տարածքում գտնվող շենքերը, շինությունները և տրանսպորտային միջոցները զավթած, ոստիկաններ և բուժաշխատակիցներ պատանդ վերցրած կազմակերպված զինված խմբին միանալու փորձի, ինչպես նաև «զինվելու, ապօրինի կերպով հրազեն ու ռազմամթերք կրելու, պահելու և խմբի անդամների հետ համակատարմամբ զավթած ու պատանդներին պահելու փորձերի մեջ, սակայն հանցագործություններն ավարտին չի հասցրել իր կամքից անկախ հանգամանքներով:
Ըստ մեղադրանքի՝ Անդրիաս Ղուկասյանի գործողություններից տուժել է 36 անձ:
Նրան մեղադրանք է առաջադրվել ՀՀ ՔՕ-ի 225-րդ հոդվածի 1-ին մասի, 34-219-րդ հոդվածի 3-րդ մասի 1-ին կետի, 34-218-րդ հոդվածի 3-րդ մասի 1-ին կետի, 34-235-րդ հոդվածի մաս 3-րդ մասի հատկանիշներով:










