Որոշ քրդեր օգնել են Քիրքուք մտնող բանակին իրենց անձնական շահերի համար. քուրդ քաղաքական գործիչ
«Քրդստանի հայրենասերների միություն» կուսակցության գլխավոր քարտուղարի օգնական Քոսրեթ Ռեսուլը հայտարարել է, որ իրենց կուսակցության ներսում որոշ անհատներ անձնական շահերից ելնելով նպաստել են Քիրքուքի հանձնմանը, այս մասին գրում է demokrathaber.org կայքը:
«Չորս կողմից մեզ վրա հարձակվելով՝ փորձեցին վայր գցել մեզ: Քուրդ ժողովուրդը ևս մեկ անգամ հիշեց մեր պապերի խոսքը՝ «քրդերն իրենց լեռներից բացի այլ բարեկամ չունեն»: Իրենց անձնական ու ժամանակավոր շահերի համար Քիրքուք մտնողներին օգնողների անունները կգրվեն մեր պատմության սև էջերում», - ասել է քուրդ քաղաքական գործիչը:
Հիշեցնենք, որ օրեր առաջ Իրաքի ուժերը սկսել են երկրի հյուսիսում գտնվող թուրքմեններով, արաբներով և քրդերով բնակեցված Քիրքուք շրջանի վրա գրոհը, որն Իրաքյան Քրդստանի ու Իրաքի միջև վիճելի տարածքներից մեկն է համարվում: Կարճ ժամանակ անց իրաքյան բանակին հաջողվել է վերահսկողություն սահմանել Քիրքուքի օդանավակայանի և կարևոր նավթահանքերի օբյեկտների նկատմամբ:
Քիրքուքը պաշտոնապես Իրաքյան Քրդստանի մաս չի կազմել, սակայն տեղի քրդերը մասնակցել են անկախության հանրաքվեին:










