Վարչապետը հանձնարարեց 2 ամսում ուսումնասիրել Երևանում խցանումների նվազեցման տարբերակները (տեսանյութ)
Կառավարության այսօրվա նիստի ընթացքում ՀՀ վարչապետ Կարեն Կարապետյանը հանձնարարականներ տվեց ճանապարհային երթևեկության ընթացքում առաջացող խցանումները վերացնելու վերաբերյալ: Վարչապետն ասաց, որ վերջին ժամանակահատվածում կառավարության կողմից նախաձեռնվել են օրենսդրական և գործնական բարեփոխումներ ճանապարհային կանոնների պահպանման և նվազ նշանակության իրավախախտումների համար նախազգուշացման կիրառման ուղղությամբ:
«Ճանապարհային կանոնների խախտման դեպքերով տուգանքները, հավելող տույժերը վերացվել են. վարչական իրավախախտումների վերաբերյալ օրենսգրքի նախագծով նախատեսվել են նախազգուշացման ինստիտուտի կիրառման ճկուն մեխանիզմներ»,-ասաց վարչապետը:
Նրա խոսքով՝ չնայած դրան փաստ է, որ աշխատանքային օրերին Երևան քաղաքում առկա են խցանումներ, որոնց պատճառները բազմազան են և պետք է լուծումներ տալ:
Կարապետյանը նկատեց, որ խնդիրներ են առաջանում նաև ուղևորների նստելու կամ իջնելու դեպքերում` օրենքով սահմանված կարգով մեկ րոպե ժամանակահատվածը չպահպանելու պատճառով:
«Ելնելով վերոնշյալից՝ հանձնարարում եմ տրանսպորտի, կապի և տեղեկատվական տեխնոլոգիաների նախարարին, քաղաքաշինության պետական կոմիտեի նախագահին, ոստիկանապետին և Երևանի քաղաքապետին՝ երկամսյա ժամկետում ուսումնասիրել Երևան քաղաքում խցանումների նվազեցման հնարավորությունները՝ հաշվի առնելով որոշ հատվածներում ավտոկայանատեղերի սահմանափակման, ճանապարհային երթևեկության կազմակերպման և հսկողության խստացման ժամանակակից տեխնոլոգիաների ներդրման, ինչպես նաև այլընտրանքային երթուղիների կառուցման հարցերը և կառավարության աշխատակազմ ներկայացնել առաջարկություններ»,- ասաց գործադիրի ղեկավարը:
Միաժամանակ, վարչապետը տրանսպորտի, կապի և տեղեկատվական տեխնոլոգիաների նախարարին և ոստիկանապետին հանձնարարեց մեկամսյա ժամկետում ուսումնասիրել ուղևորների նստելու կամ իջնելու նպատակով կանգառ կատարելու դեպքերում սահմանված ժամանակահատվածի գերազանցումների արձանագրման մոտեցումների վերանայման հնարավորությունը և առաջարկություն ներկայացնել կառավարության աշխատակազմ:










