Վրաստանն ունի այլ արտաքին քաղաքական կուրս, մենք՝ այլ, բայց դա չի խանգարելու մեզ զարգացնել մեր եղբայրական հարաբերությունները. Է. Շարմազանով
Հարաբերությունները բավական դրական զարգանում են բոլոր ուղղություններով՝ թե՛ գործադիրի, թե՛ խորհրդարանական մակարդակով, թե՛ ժողովուրդների, թե՛ տնտեսական ու քաղաքական լուրջ հնարավորություններ կան այդ պոտենցիալը զարգացնելու: Այսօր ՀՀԿ Գործադիր մարմնի նիստից հետո լրագրողներին ասաց ԱԺ փոխնախագահ, ՀՀԿ խոսնակ Էդուարդ Շարմազանովն՝ անդրադառնալով ՀՀ նախագահ Սերժ Սարգսյանի Վրաստան կատարած այցին: Նա կարծում է, որ այս այցը սա բացառիկ էր:
Էդուարդ Շարմազանովը շեշտեց, որ ինքը որպես ականատես էլ կարող է ասել ու հիշեցնել, որ Վրաստանի հետ Հայաստանը բարեկամ պետություն է, և իրավունք չկա մոռանալու, որ հայ-վրացական միացյալ զորքերը շատ բնակավայրեր են ազատագրել:
«Այսօր էլ մենք ունենք շատ լավ հիմք՝ զարգացնելու մեր եղբայրական և բարեկամական հարաբերությունները: Չնայած Վրաստանն ունի այլ արտաքին քաղաքական կուրս, մենք՝ այլ, բայց դա չի խանգարելու մեզ, որպեսզի մենք զարգացնենք մեր եղբայրական հարաբերությունները: Իհարկե, կան բազմաթիվ հարցեր, բայց չկա որևէ հարց, որը հնարավոր չլինի լուծել հայ-վրացական բարձր բանակցությունների միջոցով: Երկու կողմից էլ կա և՛ ցանկություն, և՛ քաղաքական կամք բարեկամական հարաբերությունները զարգացնելու»,-ասաց Էդուարդ Շարմազանովը:
ԱԺ փոխխոսնակը Վրաստան կատարած այցի առնչությամբ կարևորեց պետության ղեկավարի անձնական ներդրումը. «Պարոն նախագահի ներդրումը հայ-վրացական հարաբերությունների ամրապնդման, նաև տարածաշրջանային անվտանգության ու կայունացման գործում շատ մեծ է: Ես, որպես հայ-վրացական խորհրդարանական հանձնաժողովի համանախագահ, պետք է իմ հայ ու վրացի գործընկերների հետ հնարավորինն անենք, որպեսզի նաև խորհրդարանական մակարդակում ազնիվ ու անկեղծ քննարկենք բոլոր հարցերը, մյուս կողմից կառավարություններն են շատ ինտենսիվ աշխատում»,- շարունակեց նա:
ՀՀԿ մամուլի խոսնակը հայ-վրացական հարաբերություններում մեծ նշանակություն է տալիս նաև դեսպանների դերին ու աշխատանքին: Ըստ նրա՝ նաև ՀՀ-ում Վրաստանի դեսպանն է ակտիվ աշխատում:
«Մեր նորանշանակ դեսպանը՝ Ռուբեն Սադոյանը՝ նախկին պատգամավորը շատ ինտենսիվ աշխատում է: Դեռ մեկ ամիս չկա, որ նա նշանակվել է, բայց ի ուրախություն մեզ՝ մենք Վրաստանում ի դեմս պարոն Սադոյանի՝ ունենք շատ ակտիվ գործող, պրոֆեսիոնալ, հայրենասեր և պետականամետ մարդ և գործիչ, ով անում է հնարավորը, որպեսզի երկու բարեկամ պետությունների ու ժողովուրդների հարաբերությունները զարգանան: Ես դա տեսել եմ իմ աչքերով: Կարծում եմ՝ այս բոլոր ուղղություններով մենք պետք է շարունակենք մեր աշխատանքները»,-եզրափակեց Էդուարդ Շարմազանովը:










