Այս տարի նախատոնական թանկացումներն արտառոց են, բայց ժողովուրդը խնայողության չի անցնում. Կ. Չիլինգարյան

22:05 • 29.12.17

Հայաստանում Նոր տարվա շեմին ամեն ինչ թանկանում է` ի տարբերություն այլ երկրների:

Այս մասին Tert.am–ի հետ զրույցում ասաց «Սպառողների խորհրդատվության կենտրոն» ՀԿ  նախագահ Կարեն Չիլինգարյանը՝ավելացնելով, որ չնայած նկատվող թանկացումներին մարդիկ խնայողության ռեժիմին չեն անցնում:

«Անբնական թանկացումներ են այս տարի, բայց միևնույն է մարդիկ էլի գնումներ անում են, խանութները լիքն են, սայլակները լիքը: Անկախ թանկացումներից ժողովուրդը շարունակում է գնել: Թեև երեք, չորս տարի առաջ մարդիկ ավելի շատ էին, այդ քանակն էլ է պակասել, քանի որ ինչքան էլ չլինի, համենայնդեպս արտագաղթ կա»,-ասաց Չիլինգարյանը:

Նրա խոսքով՝ այս տարվա նախատոնական թանկացումներն արտառոց էին: Նախորդ տարիներին  ապրանքները թանկանում էին աստիճանաբար, այս տարի կտրուկ եղավ:

«Այս տարի թանկացումը շուտ սկսվեց ու բարձր տոկոսով, նախորդ տարիներին քիչ-քիչ սկսում էին, զսպողական մեխանիզմ կար, իսկ այս տարի և միսը և կարագը թանկացան:  Միսը քիչ-քիչ թանկացավ՝ օրական 10- 20 դրամով թանկացրեցին: Բանանը թանկացավ նորից, թեև մտածում էինք շուկան ազատականացվել է, բայց ոչ»,-ասաց Կարեն Չիլինգարյանը:

Սպառողների խորհրդատվության կենտրոնի թեժ գծին այս օրերին շատ զանգեր չիեն ստացվում, պատճառը, ըստ Չիլինգարյանի, մարդիկ արդեն սովորել են, որ մեր երկրում ամեն տարի թանկացումներ լինելու են:

«Ժողովուրդն արդեն չի էլ զանգում թանկացումների հետ կապված: Սովորել են, որ այս երկրում այդպես է ընդունված: Այն ընտանիքները, որոնք սոցիալապես անապահով են՝ 30-40 հազար դրամով էլ մի կերպ կարող են փոքր սեղան գցել,  Նոր տարի անել, միջին ապրող ընտանիքի համար 60- 80 մինչև առավելագույնը 100 հազար դրամ կարելի է նորմալ սեղան գցել»,- ասաց Չիլինգարյանը:

Նա սպառողներին հորդորեց այս օրերին հատկապես ուշադիր լինել գնվող ապրանքների պիտանելիության ժամկետներին ու նաև գնապիտակներին՝ հատկապես խոշոր խանութներում և սուպերմարկետներում գնումներ կատարելիս: