Ինդոնեզիայում տեղի է ունեցել Սինաբունգ հրաբխի ամենահզոր ժայքումը 2017 թվականին

20:04 • 29.12.17

Ինդոնեզիայի Սումատրա կղզում գտնվող Սինաբունգ հրաբուխը ժայթքել է հերթական անգամ՝ գազի և մոխրի ամպեր նետելով երկինք:

Ինչպես հաղորդում է Press TV-ն՝ մեջբերելով տեղի պաշտոնյաներին, այս շաբաթ տեղի է ունեցել ընթացիկ տարվա ամենամեծ ժայթքումը: Հրաբուխը, որը կրկին ակտիվացել է 2010 թվականին՝ 4 դար տևած լռությունից հետո, կանոնավոր կերպով ժայթքում է 2015 թվականից ի վեր: Հրաբխի ակտիվության պատճառով ավելի քան 3000 ընտանիք է տեղահանվել:

Դեկտեմբերի 27-ին տեղի ունեցած ժայթքումն ամենամեծն էր, որը տեղի է ունեցել 2017 թվականին՝ առավել մեծ տարածք պատելով մոխրով:

Ակտիվ ժայթքումների հետևանքով տեղի բնակիչները չեն տուժել, սակայն ստիպված են եղել լքել իրենց տներն ու առավել ապահով վայրեր տեղափոխվել:  

Ժայթքման հետևանքով առաջացող մոխիրը վնասում է մշակաբույսերը, ինչն, իր հերթին, ֆինանսական դժվարություններ կստեղծի բնակիչների համար: