Մահմուդ Ահմադինեժադի փաստաբանը հերքել է նրա ձերբակալության մասին տեղեկությունը. լրատվամիջոցներ
Իրանի նախկին նախագահ Մահմուդ Ահմադինեժադի փաստաբան Ադել Հեյդարին հերքել է իսլամական հանրապետության տարբեր քաղաքներում անցկացվող բողոքի ցույցերին աջակցելու համար Ահմադինեժադի ձերբակալության մասին ԶԼՄ-ների հաղորդագրությունները: Այդ մասին հայտնում է ТАСС-ը՝ վկայակոչելով Erem news լրատվական պորտալին:
«Իմ հաճախորդի՝ նախկին նախագահ Մահմուդ Ահմադինեժադի ձերբակալության մասին տեղեկությունը չի համապատասխանում իրականությանը»,- ասել է Հեյդարին՝ մեկնաբանելով արաբական մամուլի հրապարակումները:
Թեհրանում մինչ այժմ այդ տեղեկությունը պաշտոնապես ոչ հաստատվել է, ոչ հերքվել:
Ավելի վաղ Լոնդոնում հրապարակվող արաբական Al-Quds Al-Arabi թերթը, վկայակոչելով իրանական աղբյուրների, հայտնել էր, որ նախկին նախագահը ձերբակալվել է Շիրազում: Թերթի պնդմամբ՝ ձերբակալության պատճառը եղել են հակակառավարական ցույցերի ժամանակ քաղաքական գործչի հայտարարությունները, որոնք Թեհրանում դիտարկվում են որպես «անկարգությունների հրահրման» կոչ:
Նշվում է, որ երկրի նախկին ղեկավարն այցելել է Իրանի հարավում գտնվող Բուշեր քաղաք, որտեղ բնակիչների հետ հանդիպման ընթացքում հայտարարել է, որ իշխանություններին չեն մտահոգում սովորական մարդկանց խնդիրները: Նա մեղադրել է նախագահ Հասան Ռոհանիի կառավարությանը երկիրը կառավարելու անկարողության համար:
Հիշեցնենք, որ Իրանում գնաճի պատճառով բողոքի ցույցերը սկսվել են դեկտեմբերի 28-ին, որոշ քաղաքներում բախումներ են տեղի ունեցել, որոնց ընթացքում զոհվել է 20 մարդ, ձերբակալվել է ավելի քան 450 ցուցարար:










