250 000 դրամը ֆանտաստիկ թիվ է. քաղաքացիները՝ ծխելու համար սահմանված տուգանքների մասին (տեսանյութ)

20:10 • 26.01.18

Ի՞նչ կարծիք ունեն մեր համաքաղաքացիները ծխելը մի շարք վայրերում արգելող և տուգանքներ սահմանող նախագծի վերաբերյալ. Tert.am-ը փորձել է դա պարզել հարցումներով:

«Ճիշտ օրենք է: Ծխելը վնասակար է առողջության համար, կողքի նստողների համար, ընդհանրապես կուլտուրայի համար: Դեռահասների մոտ շատ են ծխում, որ կողմը պտտվում նայում ես, ծխում են»,-ասաց քաղաքացիներից մեկը՝ ավելացնելով, որ սահմանված տուգանքի չափն է մեծ, և այն պետք է համապատասխանի մարդկանց գրպանին:

Նշենք, որ ՀՀ առողջապահության նախարարության ներկայացրած «Ծխախոտային արտադրանքի օգտագործման բացասական ազդեցության նվազեցման և կանխարգելման մասին» նոր օրինագծով 250 000 դրամի չափով տուգանք է սահմանվում չնախատեսված վայրում ծխելու համար: Առաջարկվում է ծխելու արգելք սահմանել մեքենաներում, բոլոր փակ տարածքներում: Նույն խախտումը երեք ամսվա ընթացքում կրկին կատարելու դեպքում ծխողը կտուգանվի 500 000 դրամով:

«Թող մեկ միլիոն սարքեն: Թող ավելի շատացնեն ծխելու համար տուգանքը, որ պետությանը ավելի շատ փող տանք: Աշխատենք, տանք պետությանը թող զարգանա, թե չէ շատ խեղճ է ապրում պետությունը»,-ասաց քաղաքացիներից մեկը՝ իր զայրույթն արտահայտելով ներկայացված օրինագծի կապակցությամբ:

«Մարդիկ պետք է փող ունենան, որ տան այդքան՝ ծխելու համար: Չի գործելու այդ օրենքը այստեղ»,-ասաց մյուս քաղաքացին:

Հարցվածների մի մասն ընդհանրապես չի ծխում և կարծում է, որ օրենքը պետք է մտահոգի բացառապես ծխողներին:

«Դե ընդհանրապես այս քաղաքի վիճակը, որ նայում ես նաև հասարակական վայրերում, ծխելու հետևանք է, բայց դե ծխող մարդուն մի քիչ դժվար է սահմանափակման մեջ դնել: Հայաստանի համար 250 հազար դրամը ֆանտաստիկ թիվ է: Օրինակ՝ Ամերիկայում 2 հազար դոլար են տուգանում, 250 հազարն էլ այստեղ մեր համար է 2 հազար դոլար: Պարզապես պետք է հասնել այն գիտակցությանը, որ ամեն ինչի համար օրենք պետք չէ հնարել: Օրենքը միշտ էլ հնարավորություն է տալիս շրջանցելու»,-ասաց քաղաքացիներից մյուսը:


Մանրամասները՝ տեսանյութում: