Սիրիայի ազգային երկխոսության կոնգրեսի մասնակից երկրները համատեղ հայտարարությամբ են հանդես եկել
Ռուսաստանի Սոչի քաղաքում Սիրիայի ազգային երկխոսության կոնգրեսին մասնակցած կողմերը համատեղ հայտարարություն են ընդունել՝ կոչ անելով բանակցային գործընթացի ու հակամարտության կողմերին պահպանել Սիրիայի ինքնիշխանությունն ու տարածքային ամբողջականությունը:
Ինչպես փոխանցում է TACC գործակալությունը, համաժողովի անդամ երկրները որոշում են կայացրել սիրիական հարցի՝ Սիրիայի ժողովրդի ազատ ընտրության միջոցով լուծման, ինչպես նաև երկրի սահմանադրության որոշ կետերի փոփոխության անհրաժեշտության մասին:
Հայտարարության մեջ շեշտվել է հետագա գործընթացների՝ ժողովրդավարական հիմքերի վրա կառուցման, ինչպես նաև ահաբեկչության դեմ ընդհանուր պայքարի, Սիրիայում ծայրահեղականության վերացման կարևորությունը:
Հիշեցնենք, որ սիրիական ընդդիմությունը հրաժարվել էր մասնակցել Սիրիայի ազգային երկխոսության կոնգրեսին, երբ Սոչի ժամանելուն պես ընդդիմության ներկայացուցիչները նկատել էին օդանավակայանում և համաժողովի սրահում իրենց կողմից չընդունվող Սիրիայի պետական դրոշը: Ընդդիմության շահերը համաժողովին ներկայացրել էր Թուրքիան:
Սիրիայի հյուսիսում թուրքական ԶՈւ-ի կողմից քուրդ զինյալների դեմ իրականացվող ռազմական գործողության պատճառով համաժողովը բոյկոտի էր ենթարկվել քրդական ուժերի կողմից, որոնք բանակցություններին չեն ներկայացել:
Նշենք, որ այս համաժողովում Սիրիայի հայ համայնքի շահերն են ներկայացրել Սիրիայի խորհրդարանի պատգամավորներ Նորա Ասիրյանը՝ Դամասկոսից, Ժիրայր Ռեիսյանը՝ Հալեպից, ինչպես նաև Դամասկոսի թեմի առաջնորդ Տ. Արմաշ եպս. Նալբանդյանը:










