Կարող եմ ձեռքս դնել Աստվածաշնչի վրա ու երդվել, որ նման բան չի եղել. Արշակ Ղազարյանը՝ Ա. Սարգսյանի ու Վ. Սարգսյանի միջև կոնֆլիկտի մասին
Կարող եմ ձեռքս դնել Աստվածաշնչի վրա ու երդվել, որ նման բան չի եղել: Այսպիսի հայտարարություն է արել ՀՀԿ-ի առաջադրած՝ ՀՀ նախագահի թեկնածու Արմեն Սարգսյանի անվտանգության նախկին աշխատակից Արշակ Ղազարյանը «Amga.tv»-ի եթերում ՝ անդրադառնալով լուրերին, թե այն ժամանակ դեռևս պաշտպանության նախարար Վազգեն Սարգսյանն ապտակել է այդ ժամանակ վարչապետ Արմեն Սարգսյանին:
Արշակ Ղազարյանը լրագրող Արթուր Սահակյանի՝ Amga.tv-ով հեռարձակվող «30 րոպե» հեղինակային հաղորդման հյուրն է եղել, որտեղ էլ պատմել է, որ իր նախաձեռնությամբ է հաղորդմանը հյուրընկալվել և որոշել խոսել այդ մասին: Նա նշել է, որ Արմեն Սարգսյանի վարչապետ եղած ժամանակ ինքը և իր ընկեր Միշան եղել են նրա անվտանգության ավագ աշխատակիցները:
«Մենք սպասարկել են Արմեն Սարգսյանին, նրա հետ օրվա ընթացքում ամենաքիչը 13 ժամ ենք անցկացրել: Արմեն Սարգսյանը շատ ծանր աշխատանքային գրաֆիկ ուներ՝ առավոտյան ժամը 7-ից մինչև երեկոյան 3-4-ն աշխատում էր: Ես քաղաքական գործիչ չեմ, զուտ հայ մարդ ու հայ տղա եմ, որն ուզում է իրականությունն ասել: Այնքան բաներ սկսեցին խոսել, շատ բաներ եմ լսել ու լսում եմ, բայց բանի տեղ չեմ դնում: Ես չէ, որ պետք է պաշտպանեմ Արմեն Սարգսյանին»,- ասել է նա:
Արշակ Ղազարյանի խոսքով՝ Արմեն Սարգսյանի հետ աշխատելով, ինքը միշտ ականատես է եղել, որ Վազգեն Սարգսյանն ու Արմեն Սարգսյանը միշտ ջերմ հարաբերություններ են ունեցել: Ղազարյանը համաձայնել է դիտարկմանը, որ ինքը նախարարի ու վարչապետի անձնական խոսակցություններին ներկա չի եղել, բայց վստահեցրել է, որ եթե նման միջադեպ լիներ՝ ինքը հաստատ տեղյակ կլիներ: «Եթե նման դեպք եղած լիներ, բնական է, որ արձագանքը մենք կզգայինք, որովհետև աշխատում էինք այդ մարդու հետ, փորձում պաշտպանել ու նրա դեմքի միմիկաներից անգամ կարող էինք հասկանալ, թե ինչ է կատարվել կամ կատարվում»:
Անվտանգության նախկին աշխատակիցը խոսել է նաև Արմեն Սարգսյանի՝ պաշտոնից հեռանալու մասին և ցավով նշել, որ այդ ժամանակ նա առողջական խնդիրներ ուներ:
«Արմեն Սարգսյանն իրոք ուներ առողջական խնդիր՝ կոկորդի հետ կապված: Նա ինձ խնդրել էր, որ գիշերային հերթափոխի տղաներին ասեմ աշխատասենյակի պատուհանները բաց թողնեն, որպեսզի սենյակում միշտ խոնավություն լինի, կոկորդը չորանում էր: Դեղերը միշտ մեզ հետ բերում էինք, առանց դրանց նա չէր կարող: Ես Արմեն Սարգսյանին վերջին անգամ հանդիպել եմ 1999 թվականին, այդ ժամանակ նա պատմեց, որ չարորակ է, բայց փառք Աստծո, բուժվել է»,- եզրափակել է Արմեն Սարգսյանի անվտանգության նախին աշխատակիցը:










