Պրոթեզավորման մրցույթների արդյունքները դեռ ամփոփված չեն, աղմուկն անհասկանալի է. Արթուր Կեսոյան
Կառավարության դիմաց բողոքի ակցիա են իրականացնում արցախյան ազատամարտի տարիներին հաշմանդամություն ձեռք բերած ազատամարտիկներ, ապրիլյան պատերազմի ժամանակ վիրավորված ու հաշմանդամություն ստացած զինվորականներ, Գյումրիում երկրաշարժի հետևանքով հաշմանդամ դարձած քաղաքացիներ:
Հաշմանդամություն ունեցող անձինք բողոքում են՝ պրոթեզավորման իրավունքը փոխանցվել է այլ կազմակերպության, որը շահել է հայտարարված մրցույթը, սակայն իրենց տարիներ շարունակ սպասարկել է գերմանական «Ինտերօրթո» պրոթեզավորման գերմանական կենտրոնը: Այժմ մրցույթը հաղթել է «Պրոթեզաօրթոպեդիկ» ՍՊԸ-ն:
Կառավարության դիմաց բողոքի ակցիա անցկացնող քաղաքացիներին մոտեցավ Աշխատանքի և սոցիալական հարցերի նախարարության հաշմանդամների և տարեցների հիմնահարցերի վարչության պետ Արթուր Կեսոյանը, ով ասաց, որ մրցույթների արդյունքները դեռ ամփոփված չեն:
Քաղաքացիներն ասացին, որ վարչապետին նամակ են ուղղել, սակայն դեռ պատասխան չեն ստացել:
«Վարչապետին ուղղված նամակը մեկօրյա ժամկետում վերահասցեավորվել է Սոցապնախարարությանը: Խնդիրն այն է, որ նամակում ասվում է, թե գերմանական պրոթեզավորման ընկերությունը փակվել է, սակայն չի փակվել, մրցույթի արդյունքում այլ կազմակերպություն է համապատասխանում չափանիշներին, իսկ վերջնական արդյունքները դեռ ամփոփված չեն»,-ասաց պաշտոնյան։
Կեսոյանը հայտնեց, որ մրցույթի նպատակն է, որ պրոթեզավորումը համապատասխանի միջազգային չափանիշներին: Դիտարկմանը, թե մարդկանց սարքել են փորձադաշտ, Կեսոյանն առարկեց և ասաց, որ մրցույթի նպատակն է համապատասխանեցնել պրոթեզավորումը միջազգային չափանիշներին:
«Փորձադաշտ չենք սարքում։ Այն չափանիշները, որոնք ներառված են առաջարկների մեջ, դեռ հաշվարկված չեն, ոչ ոք չգիտի, թե ով է հաղթել, այդ չափանիշներին համապատասխանո՞ւմ են, թե ոչ: Հաջորդ քայլն այն է լինելու, որ մենք անցնենք հավաստագրման կարգի, մենք հավաստագիրը տալու ենք, դուք վերցենք ու գնաք այն կազմակերպությունը, որը դուք կուզեք գնալ, որը հաղթել է մրցույթում: Այս պահին երկու ընկերություն է հաղթել, բայց դեռ ամփոփումը չի ավարտվել»,-ասաց Կեսոյանը:
Ինչ վերաբերում է հավաստագրի տրմանը, ապա Կեսյանն ասաց, որ հավաստագիր տրվելու է 2019 թվականից. «Աղմուկը հասկանալի չէ, ամեն ինչ արվում է չափանիշներին համապատասխան, իսկ մրցույթն անցկացվել է թափանցիկ»:










