Սումգայիթյան գործընթացը ՀՀ-ի իրավատիրույթից հանվեց, տրվեց օտար ատյանի՝ կոնկրետ քաղաքական վճիռ ստանալու ակնկալիքով, որն էլ ստացվեց. Ա. Մելիքյան

15:09 • 22.02.18

ՀՀ ԱԺ արտաքին հարաբերությունների մշտական հանձնաժողովի նախաձեռնած  «Սումգայիթյան ջարդեր. հայատյացությունը որպես Ադրբեջանի պետական քաղաքականություն» թեմայով խորհրդարանական լսումներին Արցախի նախկին արտգործնախարար Արման Մելիքյանը հայտարարեց, թե նման քննարկումներն իր մոտ դեժավյուի տպավորություն են թողնում:

Ըստ նրա՝ հայկական կողմը 30 տարի է՝ նույն բանն է կրկնում. «Մենք 30 տարի ինքներս մեզ պատմում ենք, թե ինչ վատն է ադրբեջանցին, իսկ մենք ի՞նչ ենք անում, ի՞նչ ենք արել: Նախիջևանի մասին խոսք գնաց, որը տեղի է ունեցել ոչ թե  20-21 թթ.,  այլ 28-ին՝ խաղաղ պայմաններում, որովհետև որոշում կայացվեց, որ պետք է Նախիջևանի հայությունն ապրի Բաքվում, Սումգայիթում, բայց ոչ Նախիջևանում: Ընդունենք այն ժամանակ խորհրդային կարգեր էին, Հայաստանի ղեկավարները չէին կարող միջամտել վերին ատյանի որոշումներին, իսկ ի՞նչ է կատարվում մեր օրերին, ինչպե՞ս ենք վերաբերվում մենք ադրբեջանահայ փախստականների խնդրին: Մենք այդ խնդրին չենք վերաբերվում»:

Ըստ Մելիքյանի՝ հայկական կողմն անընդհատ խոսում է մեռելների ու ցեղասպանության մասին, իսկ թե կենդանի մնացած փախստականների խնդիրը թողնում է օտար արտյանների, ՄԻԵԴ-ի հույսին: Ըստ նրա՝ արվածը միայն քարոզչություն է, այն էլ՝ առանց քաղաքականության, ինչը ոչ այլ ինչ է, քան օդի տատանում:  

Արման Մելիքյանը հայտարարեց, թե 2006-2007 թթ. անկախ ՀՀ-ի պայմաններում ՀՀ-ի ոչ պաշտոնական, նաև պաշտոնական մասնակցությամբ մի գործընթաց է ծավալվել: «ՄԻԵԴ-ում վճիռ կայացվեց, ըստ որի՝ Բաքվի, Սումգայիթի, Կիրովաբադի հայությունը դուրս է թողնվել իրավական գործընթացից: Այսինքն՝ այդ դատարանը «ադրբեջանցի» կոչված քուրդ փախստականի և շահումյանցի հայ փախստականի հարցով վճիռներ կայացրեց և ուրվագծվեց հակամարտության գոտին, որից դուրս են մնացել 400-450  հազար հայ փախստականներ: Իսկ ո՞վ գիտի՝ ՀՀ-ից ինչպես ընտրվեցին ու ուղարկվեցին գործերը ՄԻԵԴ»,-հարցրեց նա: 

Արցախի նախկին արտգործնախարարը նշեց, թե ունի սուղ տվյալներ դրա հետ կապված: «Կար մի ՀԿ, որը ստեղծվեց Արդարադատության նախարարության կողմից, կոչվում է «Իրավական ուղի», այդ կազմակերպությունը գրանտ էր ստացել Եվրոպայից՝ շուրջ 2 մլն դոլարի սահմաններում: Այդ մարդիկ ընտրել էին գործերը, ուղարկել դատարաններ: Ովքեր են եղել փաստաբանները՝ չգիտեմ, բայց այդ գործընթացը ՀՀ-ի իրավատիրույթից հանվեց, տրվեց օտար ատյանի՝ կոնկրետ քաղաքական վճիռ ստանալու ակնկալիքով, որն էլ ստացվեց»,-հայտարարեց նա:

Արման Մելիքյանի խոսքով՝ այսօր ՀՀ-ում պետք է դատական ատյան ստեղծվի, և քննվեն բոլոր այդ գործողությունները և բոլոր տուժած մարդիկ՝ վճիռների մասով:

«Ցանկացած հայ քաղաքացի պետք է պաշտպանված լինի նաև այդ վճիռներով»,-ասաց նա: