Ռուս ընդդիմադիր գործիչ Նավալնին հայտարարել է, որ իրեն ազատ են արձակել
Ռուս ընդդիմադիր գործիչ Ալեքսեյ Նավալնին հայտնել է, որ իրեն ազատ են արձակել հանրահավաքի կազմակերպման կարգը կրկնակի խախտելու համար այսօր ձերբակալվելուց հետո՝ հավելելով, որ իրեն բաց են թողել մինչև դատը: Այդ մասին հայտնում է «ՌԻԱ Նովոստի»-ն:
Ավելի վաղ Նավալնին և նրա շտաբի ղեկավար Լեոնիդ Վոլկովը սոցիալական ցանցերում հայտնել էին Մոսկվայում իրավապահների կողմից իրենց ձերբակալության մասին:
Նշվում է, որ հանրահավաքի կազմակերպման կարգը կրկնակի խախտելու՝ ՌԴ վարչական իրավախախտումների մասին հոդվածը ենթադրում է մինչև 3 հարյուր հազար ռուբլի տուգանք, մինչև 200 ժամ պարտադիր աշխատանք կամ մինչև 30 օր կալանք:
Նավալնիի փաստաբան Օլգա Միխայլովան «ՌԻԱ Նովոստի»-ի հետ զրույցում ենթադրել է, որ ձերբակալությունը, հնարավոր է, կապված է եղել Մոսկվայի կենտրոնում չարտոնված ակցիայի հետ, որը կայացել է հունվարի 28-ին: Նրա խոսքով՝ Նավալնիի գործը քննվելու է Տվերի դատարանում:










