«Ես օրը երկու անգամ գինի եմ խմում». Մակրոնը հայտնել է, որ թույլ չի տա գինին ուժեղ ալկոհոլի հետ նույն շարքին դասել

16:41 • 23.02.18

Ֆրանսիայի նախագահ Էմանուել Մակրոնը հայտնել է, որ թույլ չի տա նույն շարքին դասել գինին ուժեղ ալկոհոլի հետ՝ խոստովանելով, որ ինքն օրը երկու անգամ խմում է «ավանդական ֆրանսիական ըմպելիքը»: Այս մասին հայտնում է РИА Новости-ն՝ հղում անելով France Info ռադիոկայանին:

«Հասարակության առողջությունը բախվել է պատուհասի, որն արտահայտվում է նրանում, որ երիտասարդները գնալով ավելի շատ են ուժեղ ալկոհոլ կամ գարեջուր խմում, սակայն գինու դեպքում դա այդպես չէ», - ասել է Մակրոնը մամուլի ասուլիսի ժամանակ:

«Անձամբ ես գինի եմ խմում ցերեկը և երեկոյան», - ասել է Մակրոնը՝ հավելելով, որ իր նախագահության ընթացքում թույլ չի տա «ալկոհոլի և ծխախոտի օրենսդրության խստացման վերաբերյալ որևէ փոփոխություն»:

Ֆրանսիայում ալկոհոլային օրենսդրության խստացման վերաբերյալ քննարկումը սկսվել է փետրվարի սկզբին, երբ երկրի առողջապահության նախարար Անյես Բուզինը հայտնել էր, որ «գինու արդյունաբերությունը ստիպում է հավատալ, որ գինին տարբերվում է մյուս ալկոհոլային խմիչքներից և մի շարք օգտակար հատկություններ ունի»՝ չնայած, ինչպես գիտական, այնպես էլ հասարակության առողջության տեսանկյունից, «գինի խմելը նույնն է, ինչ գարեջուր, օղի կամ վիսկի խմելը»:

Ի պատասխան այս հայտարարության՝ մի շարք գիտնականներ, գրողներ և բժիշկներ հոդված են հրապարակել Figaro-ում՝ կոչ անելով առողջապահության նախարարին «դադարել դեմոնիզացնել գինին, որը ֆրանսիական քաղաքակրթության մասն է»:

Մակրոնը դեռևս նախընտրական քարոզարշավի ժամանակ պաշտպանել է ավանդական ֆրանսիական ըմպելիքը՝ ընդգծելով, որ «գինին կարմիր թելով անցնում է գրականության, կինեմատոգրաֆի և Ֆրանսիայի հավաքական գիտակցության միջով և իրենից ներկայացնում ֆրանսիական ոճով սեղան գցելու մի մասը»: