Քաթարի շուրջ ստեղծված դիվանագիտական ճգնաժամը չի վերաճի զինված հակամարտության. երկրի ԱԳՆ

10:42 • 23.02.18

Քաթարի իշխանությունները կողմ են Մերձավոր Արևելքում անվտանգության շուրջ համաձայնագրի կնքմանն ու վստահ են, որ իրենց երկրի շուրջ ստեղծված ներկայիս դիվանագիտական ճգնաժամը չի վերաճի զինված դիմակայության։ Այս մասին հայտարարել է Քաթարի արտաքին գործերի նախարար Մուհամմեդ բեն Աբդել Ռահման Ալ Թանին ֆրանսիական Le Figaro պարբերականին տված հարցազրույցում, փոխանցում է TACC գործակալությունը:

«Որևէ ռազմական սրում չի լինի: Մենք վստահ ենք, որ վերջնական հաշվով իրավիճակը հսկողության տակ կառնվի», - ասել է քաթարցի պաշտոնյան՝ հավելելով, որ ԱՄՆ նախագահ Դոնալդ Թրամփը Քաթարի էմիր, շեյխ Թամիմ բեն Համադ Ալ Թանիի հետ զրույցում հաստատել է ճգնաժամը կարգավորելու իր ցանկությունը, իսկ ԱՄՆ պետքարտուղար Ռեքս Թիլերսոնն այդ առիթով երեք անգամ ժամանել է Քաթար:


ԱՄՆ-ն նաև կողմնակից է, որպեսզի Քաթարը մասնակցի Պարսից ծոցի արաբական երկրների խորհրդի համագործակցության ամենամյա նիստին, և Քաթարը մտադիր է մասնակցել դրան:

Ըստ Քաթարի ԱԳՆ ղեկավարի՝ Քաթարը միակ երկիրն է, որն արձագանքել է այս առաջարկներին ու ձգտում է իրավիճակի կարգավորմանը:  

«Մեր հարևանները շարունակում են հանդես գալ Քաթարի հասցեին իրականությանը չհամապատասխանող մեղադրանքներով: Ընդ որում՝ նրանք ոչ մի անգամ չեն համաձայնվել նստել բանակցային սեղանի շուրջ», - նշել է քաթարցի պաշտոնյան:


Հիշեցնենք, որ 2017 թվականի ամռանը Սաուդյան Արաբիան, ԱՄԷ-ն, Բահրեյնն ու Եգիպտոսը հայտարարել են Քաթարի հետ դիվանագիտական հարաբերությունների խզման մասին՝ մեղադրելով Դոհային ահաբեկչությանն աջակցելու և իրենց ներքին գործերին միջամտելու համար։