Քրիստոնեական եկեղեցիների առաջնորդները փակել են Երուսաղեմի Սուրբ Հարության տաճարը՝ ի նշան հարկային և հողային նոր օրենքների դեմ բողոքի

19:52 • 25.02.18

Քրիստոնեական եկեղեցիները, որոնք ղեկավարում են Երուսաղեմի Սուրբ Հարության տաճարը, կիրակի փակել են այն որպես քաղաքային իշխանությունների կողմից նրանցից քաղաքային հարկ գանձելու մտադրությունների և անշարժ գույքի էքսպրոպրիացիայի մասին օրինագծի դեմ բողոքի նշան: Այդ մասին հայտնում է Reuters գործակալությունը:  

Հայ առաքելական, Կաթոլիկ և Հույն ուղղափառ եկեղեցիների առաջնորդները նշել են, որ քրիստոնյաների համար կարևորագույն այս սրբավայրը փակ կմնա մինչև հետագա ծանուցումը: 

Կիրակի Իսրայելի կառավարությունը պետք է քննարկի օրենքի նախագիծ, որը թույլ կտա պետությանը բռնագրավել Երուսաղեմում եկեղեցիների կողմից վերջին տարիներին անշարժ գույքի ընկերություններին վաճառված հողը: Եկեղեցիները նշել են, որ այդ օրենքի պատճառով նրանք չեն կարողանում հեշտությամբ գնորդներ գնել իրենց անշարժ գույքի համար: 

«Այս նողկալի օրինագիծը, ընդունվելու դեպքում, հնարավոր կդարձնի եկեղեցիների հողերի բռնագրավումը»,- ասված է Երուսաղեմի պատրիարք Թեոֆիլոս III-ի, Սուրբ Երկրի Կուստոս Հայր Ֆրանչեսկո Փաթոնի, Երուսաղեմի Հայոց պատրիարք Նուրհան արքեպիսկոպոս Մանուկյանի հայտարարությունում: 

Քաղաքապետարանը, բացի այդ, եկեղեցիներից պահանջում է վճարել քաղաքային հարկ` եկեղեցիներին պատկանող կոմերցիոն նշանակության անշարժ գույքից և արդեն անցել է հաշիվների կալանքի՝ պահանջելով վճարել նաև նախորդ տարիների կուտակած պարտքերը: Եկեղեցիները քաղաքապետարանի գործողություններն անվանել են «ստատուս-քվո»-ի խախտում:

«Սուրբ երկրում քրիստոնյաների դեմ համակարգային և աննախադեպ ճնշումները կոպիտ կերպով խախտում են հիմնական, ab antiquo և ինքնիշխան իրավունքները: Այդ պատճառով, որպես բողոքի նշան, մենք որոշել ենք գնալ աննախադեպ քայլի՝ փակելով Սուրբ Հարության եկեղեցին»,- ասված է Երուսաղեմի հայկական պատրիարքարանի, ուղղափառ հունական և կաթոլիկ եկեղեցու կողմից ստորագրված հայտարարությունում: 

Եկեղեցիների առաջնորդները նաև նշել են, որ Իսրայելի իշխանությունների այդ քայլերն իրենց հիշեցնում են նմանատիպ օրենքների մասին, որոնք Եվրոպայում գործում էին տասնամյակներ առաջ հրեաների դեմ: