Այս պահից պետք է ֆիքսել, որ առաջիկայում գնալու ենք բուքմեյքերական ընկերությունների գործունեության դադարեցմանը, ներդրողներն էլ իրենց քայլերը պիտի կարճ ժամկետում կառավարեն. Մ. Առաքելյան
Բուքմեյքերական ընկերությունները տարեկան 2 մլրդ դրամի չափով հարկ են վճարում, սակայն դա այն գումարը չէ, որ նրանց գործունեությունը կարելի է արդարացված համարել: Այս մասին Tert.am-ի հետ զրույցում ասաց տնտեսագետ, «Առաքելություն» կուսակցության անդամ Մեսրոպ Առաքելյանը: «Բյուջետային մուտքերը որևիցե պարագայում չեն կարող ինքնանպատակ լինել, որովհետև դրանք ծառայում են բացառապես հասարակությանը: Հիմա հասարակության համար խնդիրներ, երբեմն, կարելի է ասել՝ չարիքի հասնող ոլորտի զարգացմանը նպաստելը, դրանով որոշակի հարկեր հավաքելը, և դա հասարակությանը ծառայեցնելը, կարծում եմ՝ արդարացված չէ»,- նշեց նա: Տնտեսագետի կարծիքով՝ բիզնես տեսանկյունից արդար չէ բուքմեյքերական գրասենյակների գործունեության անմիջապես դադարեցումը, սակայն հնարավոր է խնդիրներն աստիճանական կարգավորել՝ որոշակի սահմանափակումներ մտցնելով: «Բայց, իհարկե, այս պահից պետք է ֆիքսենք, որ առաջիկայում մենք գնալու ենք նրանց գործունեության դադարեցմանը, որ նաև ներդրողներն իրենց քայլերը կարճաժամկետ հատվածում կառավարեն»:
- ԱԺ «Հայաստանի Հանրապետական կուսակցություն» խմբակցության պատգամավոր Սամվել Ֆարմանյանը հայտարարել է, որ առաջիկա ամսվա ընթացքում պաշտոնական շրջանառության մեջ է դնելու օրենսդրական նախաձեռնություն, որով ՀՀ-ում կարգելվեն բուքմեյքերական գրասենյակների գործունեությունը, ներառյալ դրանց ինտերնետ ծառայությունները՝ տեղական, թե միջազգային, ինչպես նաև on-line խաղատների գործունեությունը, ինչպես տեղական, այնպես էլ միջազգային: Ինչպե՞ս եք վերաբերվում այս օրինագծին, հնարավո՞ր է՝ ՀՀ-ում բուքմեյքերական ընկերությունների գործունեությունն ամբողջությամբ արգելել:
- Այս օրինագծի մասին արդեն երկար ժամանակ է՝ խոսվում է, անկեղծ ասած, զարմանալի է, թե պատգամավորներին ինչն է խոչընդոտել ընդունել այն: Իհարկե, ողջունելի է պատգամավորի կողմից նման մտահոգությունների բարձրաձայնումը: Ինչ վերաբերում է խնդրին, տարեց տարի նկատում ենք բուքմեյքերական ընկերությունների գործունեության ակտիվությունը Հայաստանում, որը, իհարկե, բացառիկ չէ, ամբողջ աշխարհում էլ սա կա: Սակայն, ցավոք, մենք տեսնում ենք, որ Հայաստանում հասարակության գերակշիռ մասը կապված է այդ խաղերի հետ: Եթե նախկինում՝ սկզբնական շրջանում, բուքմեյքերական ընկերությունները սպորտային հետաքրքրությունների շրջանակներում էին խաղադրույքներ առաջարկում և մարդիկ՝ լինելով սպորտի սիրահար, մասնավորապես, ֆուտբոլի, դրանով ավելի հետաքրքրությամբ էին դիտում տվյալ խաղը: Այսինքն, ավելի շատ կանխատեսումների գործոնն էր ազդում նախկինում, հիմա տարեց տարի այդ բուքմեյքերական գործունեությունը վերածվել է արդեն կազինոյի և փող աշխատելու մոլուցքի, ինչը նաև կարևորում եմ աղքատության, սոցիալական խնդիրների պարագայում, մասնավորապես, երիտասարդների շրջանում: Երիտասարդների մեծ մասը չունենալով աշխատանք, եկամուտ՝ սա փորձում է օգտագործել որպես արագ գումար վաստակելու միջոց, ինչն, ի վերջո, հանգեցնում է ավելի մեծ խնդիրների, երբեմն նույնիսկ ողբերգական հետևանքներ են լինում, երբ մարդիկ միլիոնավոր դրամների կորուստ են ունենում:
- Խաղադրույք կատարողների թվով Հայաստանը աշխարհի 247 երկրների շարքում զբաղեցնում է 42-րդ տեղը: Սա նույնպես պայմանավորո՞ւմ եք սոցիալական վիճակով:
- 42-րդ տեղը վերաբերում է ինտերնետ տիրույթում խաղադրույքների կատարման ցուցանիշին: Ինտերնետի հասանելիությունը Հայաստանում բավականին մեծ է, նաև այն էժան է: Այդ տեսանկյունից նաև երիտասարդները շատ հաճախ խուսափում են ֆիզիկապես մտնել բուքմեյքերական գրասենյակներ՝ ընտանիք, բարեկամ, աշխատավայրից հեռու: Հետևաբար, այսօր ինտերնետով, հեռախոսով խաղադրույքները կատարել ցանկացած տեղից՝ աշխատավայրից, տնից, փողոցում, շատ ավելի հեշտ և խաղացողի համար «ապահով» է, ինչով էլ պայմանավորված է այդ ինտերնետ ակտիվությունը: Այստեղ մեծ դեր ունի նաև վճարումների պարզությունը, հասանելիությունը, դա տարեց տարի ավելի է մեծացնում խաղացողների քանակը: Սա ազդեցություն է ունենում նաև դեռահասների շրջանում, ովքեր ընդամենը ունեն սմարթֆոն և փողոցում գտնվող տերմինալի միջոցով կարողանում են գործարքներ իրականացնել:
- Սամվել Ֆարմանյանը նաև հայտարարում է, որ տարբեր կառավարություններ մշտապես արգելափակել են բուքմեյքերական ընկերությունների գործունեությունն արգելելու նախաձեռնությունը՝ բերելով տնտեսական, հարկային, սոցիալական հիմնավորումներ: Այդ գրասենյակները որքա՞ն են պետությանը հարկ վճարում, ինչո՞վ է ձեռնտու նրանց գործունեությունը պետության համար:
- Եթե օգուտ ասածը դիտարկենք բացառապես հարկ վճարելու տեսանկյունից, մոտավորապես, տարեկան 2 մլրդ դրամի շրջանակում հարկ են վճարում, սակայն ամեն ինչ ունի իր գինը: Այսինքն՝ բյուջետային մուտքերը որևիցե պարագայում չեն կարող ինքնանպատակ լինել, որովհետև բյուջետային մուտքերը ծառայում են բացառապես հասարակությանը: Հավաքագրված գումարները, ի վերջո, բյուջետային ծախսերի միջոցով հասարակության համար որոշակի բարիքներ պետք է ստեղծեն: Հիմա հասարակության համար խնդիրներ, երբեմն նույնիսկ կարելի է ասել՝ չարիքի հասնող ոլորտի զարգացման նպաստելը, դրանով որոշակի հարկեր հավաքելը և դա հասարակությանը ծառայեցնելը, կարծում եմ՝ արդարացված չէ, և դա այն գումարը չէ: Իհարկե, կան աշխատատեղեր, բիզնես տեսանկյունից տնտեսական որոշակի փոքր էֆեկտ որոշակի հատվածի վրա տալիս է, սակայն համոզված եմ, որ սա այն գործունեությունը չէ, որի մեջ տնտեսական գործոնը պետք է կարևորել:
- Այսինքն, հնարավո՞ր է առանց խնդիրների ՀՀ-ում բուքմեյքերական ընկերությունների գործունեությունն արգելել:
- Ամեն դեպքում հաշվի առնելով, որ նրանց գործունեությունը տնտեսական բնույթ է կրում ամբողջ աշխարհում և բիզնես տեսանկյունը հաշվի առնելով՝ կարծում եմ՝ որքան էլ ես կողմ եմ նրանց գործունեության դադարեցմանը, սակայն անմիջապես գործունեության դադարեցումը հնարավոր է՝ բիզնես տեսանկյունից արդար չլինի, քանի որ ամեն դեպքում կատարված են ներդրումներ, կան աշխատատեղեր: Սակայն, հնարավորություն կա աստիճանական այդ խնդիրները կարգավորել՝ որոշակի սահմանափակումներով: Օրինակ, գովազդները կրճատվեն կամ արգելվեն, գրասենյակների տեղակայումը կարգավորվի և այլն: Կրթական, մշակութային շինությունների հարևանությամբ շատ հաճախ գրասենյակների առկայությունը նաև դպրոցականներին մղում են արագ գնալ և խաղադրույք կատարել: Որոշակի սահմանափակումներ կատարելու պարագայում մենք որոշակի դրական տեղաշարժ կունենանք: Բայց, իհարկե, այս պահից պետք է ֆիքսենք, որ առաջիկայում մենք գնալու ենք նրանց գործունեության դադարեցմանը, որ նաև ներդրողներն իրենց քայլերը կարճաժամկետ հատվածում կառավարեն:










