Արցախի ներքաղաքական իրավիճակը դեռևս զերծ է մնում սահմանադրական բարեփոխումներ սկսելուց, բայց դա ժամանակի խնդիր է. Դ. Իշխանյան
ԱՀ Ազգային ժողովի պատգամավոր, ՀՅԴ Արցախի կառույցի պատասխանատու Դավիթ Իշխանյանը չի կարծում, որ ճիշտ ժամանակն է՝ Արցախում սահմանադրական բարեփոխումներ սկսելու, թեև, ըստ նրա, որոշակի տրամադրություններ այդ ուղղությամբ նկատելի են, և վաղ, թե ուշ գործընթացը սկսվելու է:
Հիշեցնենք, որ Tert.am-ի հետ զրույցում ԼՂՀ ԱԺ նախկին պատգամավոր Վահրամ Աթանեսյանը նշել էր, որ Արցախում հնարավոր է՝ Սահմանադրական բարեփոխումների գործընթաց սկսվի, քանի որ համակարգը նպաստում է իշխանության անձնավորմանը, և չկա որևէ խորհրդարանական ուժեղ հակակշիռ:
Tert.am-ի հետ զրույցում ԱՀ ԱԺ պատգամավորը նշեց, որ տարբեր շերտերի կողմից տարբեր պահանջներ են դրվում, ընդհուպ մինչև նախագահի հրաժարականի պահանջ:
«Իհարկե, իմ կարծիքով՝ չկա նման ընդհանուր պահանջ, և չեն հասունացել հանրային տրամադրություններ՝ նախագահի հրաժարականը պահանջելու: Բայց, բնականաբար, կադրային փոփոխությունների և բարեփոխումների մասին հայտարարվել է երկրի նախագահի կողմից: Հունիսի սկզբներին ականատես եղաք ուժային ղեկավարների հրաժարականի պահանջին, և այդ ամենով հանդերձ՝ այդ հրապարակները եղան, նաև նախագահի կողմից ցուցաբերված նախաձեռնությամբ փոփոխություններ եղան: Այդուհանդերձ, կարծում եմ, որ ինչպես հրապարակային ներկայացրել ենք, մի քանի հանգրվանով այդ բարեփոխումները տեղի կունենան, և կարծում ենք՝ առաջին հանգրվանն արդեն իսկ հաղթահարել ենք»,-ասաց նա:
Ըստ Իշխանյանի՝ ընդհանուր առմամբ առաջին փուլում տեղի են ունեցել կադրային փոփոխություններ, որի արդյունքում նաև ակնկալիք կա համակարգային և որոշ գործելաոճի փոփոխության: «Դրա համար ժամանակ է պետք, և ժամանակն աշխատում է այդ ուղղությամբ, բայց ինչ վերաբերում է Սահմանադրության փոփոխությանը, որպես այդպիսին՝ Սահմանադրության փոփոխության քննարկումներ չկան»,-ասաց նա:
Միաժամանակ, Դավիթ Իշխանյանը հիշեցրեց ՀՅԴ տեսակետը, որ դեռևս 2017 թ-ին ԱՀ Սահմանադրության փոփոխության քվեարկության նախօրյակին ՀՅԴ Արցախի կառույցը դեմ էր գնացել գործող Սահմանադրությանը՝ դիտարկելով ժողովրդավարական սկզբունքներին և նպատակներին որոշակի արգելակող Սահմանադրություն: Նա ընդգծեց, որ ՀՅԴ-ն խորհրդարանական համակարգին էր կողմ:
«Այդուհանդերձ, մենք ականատես եղանք, որ Սահմանադրությունը դարձավ իրականություն, և մենք ստիպված էինք համակերպվել դրա հետ՝ բնականաբար, ակնկալելով որոշակի փոփոխությունների, նաև նախաձեռնությունների ցուցաբերում: Կարծում եմ դա տեղի կունենա, և այդ ամենը նույնպես ժամանակի խնդիր է, բայց այսօր ուղղակիորեն նախաձեռնել սահմանադրական փոփոխություններ և ակնկալել, որ մենք անմիջապես կհաջողենք, դեռևս հասունացած չէ այդ քաղաքական պահանջը, բայց ըստ իս՝ այս զարգացումները հենց տանելու են դրան, և տրամաբանական ավարտը լինելու են Սահմանադրական փոփոխությունները, և, գուցե, նաև մեզ հաջողվի կառավարման համակարգի փոփոխություն ընդունել: Այս իսկ առումով մենք կունենանք, վերջապես, նոր մոտեցումներ և ինչու չէ նաև ՀՀ-ի հետ մեկ քաղաքական մակարդակում կգտնվենք»,-ասաց նա:
ԱՀ ԱԺ ՀՅԴ պատգամավորը նշեց, որ, իհարկե, կոնսուլտացիաներ սկսել ցանկացած պահին կարելի է նախաձեռնել և հասունացնել: «Այդ առումով կարծում եմ, որ արգելակող հանգամանքներ չկան, միակ արգելակող հանգամանքը, որպեսզի բարձրաձայնվի, վերջին 1 ու կես, 2 ամսվա ընթացում Արցախում ստեղծված ներքաղաքական իրավիճակն է, որի պայմանները մեզ դեռևս զերծ են պահում այդ կարգի քայլեր ձեռնարկելուց, քանի որ դա կարող է այլ կերպ ընկալվել և հանրության մոտ ստեղծել ներքին քաղաքական նոր զարգացումների հիմք, իսկ մենք ընդհանրապես կողմնակից ենք դանդաղ և կայուն քայլերով առաջնորդվելուն»,- ասաց նա:










