Պալմա Դե Մալյորկայում կարգելվի վարձով բնակարաններ տալ զբոսաշրջիկներին

21:58 • 16.07.18

Իսպանական Պալմա Դե Մալյորկա քաղաքի քաղաքապետարանը սկսել է զբաղվել «զբոսաշրջիկների խնդրի» լուծմամբ. Քաղաքի բոլոր բազմաբնակարան շենքերում կարգելվի վարձով բնակարաններ տալ զբոսաշրջիկներին:

Ինչպես РИА Новости-ին տեղեկացրել են Պալմա Դե Մալյորկայի քաղաքապետարանում, նոր կանոնները պատշոնապես ուժի մեջ կմտնեն հուլիսի վերջից:

«Մենք բազմաբնակարան շենքերում զբոսաշրջային բնակարանների վարձակալության արգելք ենք մտցնում ամբողջ Պալմայում», - պատմել են քաղաքապետարանում:

Նշվում է, որ միակ բացառությունն այն տներն են, որոնք ամբողջությամբ բաղկացած են զբոսաշրջիկներին վարձով տալու համար նախատեսված բնակարաններից: Իրավախախտները կարող են տուգանվել մինչև 40 հազար եվրո գումարով:

Պալմա Դե Մալյորկայի քաղաքապետ Անտոնի Նոգերայի խոսքով՝ նպատակը լայնածավալ զբոսաշրջության կարգավորումն է:

«Մենք ցանկանում ենք, որ Պալմայում կարողանան ապրել նրա բնակիչները: Մենք կարծում ենք, որ մեզնից է սկսվում այս միտումը, քանի որ Եվրոպայի բազմաթիվ քաղաքներում առկա է նույն խնդիրը», - ասել է նա: