«Ռուսաստանը չունի Թրամփի դեմ ոչ մի կոմպրոմատ». Պուտին

10:05 • 17.07.18

ՌԴ նախագահ Վլադիմիր Պուտինն ամերիկյան Fox News հեռուստաալիքին տված հարցազրույցում հայտարարել է, որ ռուսական հատուկ ծառայությունները չունեն ԱՄՆ նախագահ Դոնալդ Թրամփի դեմ ոչ մի կոմպրոմատ:

«Բացարձակ ոչ մի»,- ասել է Պուտինը՝ հավելելով, որ նա անգամ չի իմացել, որ Դոնալդ Թրամփը գործարար եղած ժամանակ եղել է Ռուսաստանում:

«Մենք չունենք ոչ մի կոմպրոմատ, և նման բան չի կարող լինել: Չեմ ցանկանում վիրավորել Թրամփին, և վախենում եմ անքաղաքավարի լինել, բայց մինչ նախագահ առաջադրվելու մասին հայտարարելը, նա մեզ համար ոչ մի հետաքրքրություն չէր ներկայացնում»,- հավելել է ՌԴ նախագահը:

Անանուն փաստաթուղթը, որը պատմում է, որ «ռուսական գործակալները» Թրամփի դեմ կոմպրոմատներ ունեն, հրապարակել էր BuzzFeed-ը՝ 2017 թվականի հունվարին: