Ռուսական ռազմաբազան առանց զգուշացնելու ավելի քան 30 միավոր զինտեխնիկայով վարժանք է անցկացրել Փանիկում, բնակիչները վախեցել են. ծառայողական քննություն կսկսվի (տեսանյութ)

12:01 • 18.07.18

Երեկ Շիրակի մարզի Փանիկ գյուղի բնակիչները կրակոցների ու պայթյունների ձայներ են լսել, որոշ ժամանակ անց պարզել են, որ դրանց հեղինակը Գյումրիում տեղակայված ռուսական 102-րդ ռազմաբազայի ծառայողներն են: Այս մասին Tert.am-ի հետ զրույցում ասաց Փանիկի համայնքապետ Վարդան Մակեյանը:

«Սկզբից բնակիչները վախեցել էին, մինչև հասկացանք, թե ինչ է կատարվում: Ռուսական ռազմաբազայից մեզ հայտնեցին, թե ուսումնամարզական վարժանք են անցկացնում, սակայն այդ մասին մեզ ո՛չ տեղեկացրել են, ո՛չ զգուշացրել, ինչն էլ վրդովվեցրել էր համայնքի բնակիչներին»,-ասաց Մակեյանը:

Նա հայտնեց, որ բնակավայր են բերել զենք-զինամթերք, տանկեր, ինչի իրավունքը չունեն. «Տանկեր են բերել գյուղ ու մեզ չեն ասել, ո՛չ թույլտվության մասին ենք տեղյակ, ո՛չ որևէ փաստաթուղթ են ցույց տվել, ի՞նչ իմանաս, թե ինչ են իրականացնում»:

Նա հայտնեց, որ 30 միավորից ավելի տեխնիկա է բերել ու կանգնեցվել գյուղի բնակելի տների մոտ, և ասել են՝ նման հրաման ունեն. «Դիմել ենք ոստիկանություն, պատկան մարմինները զբաղվում են հարցով, որպեսզի մեզ պարզաբանում տան, իրենք էլ ներողություն խնդրեցին, թե էլ չի կրկնվի և հեռացան: Գյուղում կրքերը մի քիչ բորբոքվել են, երկխոսեցինք ու անցավ, կարողացանք խուսափել միջադեպերից»,-ասաց Մակեյանը:

Շիրակի մարզպետ Կարեն Սարուխանյանը «Արմենպրես»-ին հայտնել է, որ Փանիկում տեղի ունեցածի ուղղությամբ ռազմաբազայի հրամանատարությունը ծառայողական քննություն կսկսի:

Նշվում է, որ հուլիսի 18-ին մարզպետն ընդունել է ռազմաբազայի անձնակազմի գծով հրամանատարի տեղակալ Ալեքսեյ Պալյուխովիչին:

«Հանդիպման ընթացքում ասացին, որ եղել է ֆորս-մաժորային իրավիճակ: Հրամանատարության կողմից հրաման չի եղել: Վստահեցրին, որ հաջորդ անգամ չի կրկնվի և ներողություն խնդրեցին բնակիչներից կատարվածի համար՝ նշելով, որ սա նմանատիպ առաջին դեպքն է, և վստահեցնելով, որ մեղավորները պատասխան են տալու»,-նշել է Շիրակի մարզպետը՝ փաստելով, որ նույնիսկ հայ-ռուսական միջպետական պայմանագրով էլ է նախատեսված նման միջոցառումների՝ վարժանքների դեպքում նախապես տեղեկացնել մարզպետին և համայնքի բնակիչներին: