Հրվ. Օսիայում հակամարտության տարելիցը հիշեցում է այլ չլուծված հակամարտությունների կարգավորման անհրաժեշտության մասին. ՄԱԿ-ի գլխավոր քարտուղար

10:12 • 08.08.18

ՄԱԿ-ի գլխավոր քարտուղար Անտոնիու Գուտերեշը վրաց-օսական հակամարտության 10-րդ տարելիցին կոչ է արել կողմերին հարցերը լուծել երկխոսության միջոցով: Այդ մասին լրագրողներին հայտնել է ՄԱԿ-ի ղեկավարի պաշտոնական ներկայացուցիչ Ֆարհան Հաքը, գրում է ՄԱԿ-ի կայքը:

«Բոլոր շահագրգիռ կողմերը պետք է առաջնահերթ ուշադրություն հատկացնեն երկխոսության միջոցով առաջընթացին և խուսափեն պառակտիչ քաղաքականությունից և միակողմանի գործողություններից, որոնք կարող են բացասաբար ազդել տարածաշրջանային խաղաղության և անվտանգության վրա»,- ասված է Գուտերեշի հայտարարությունում:

ՄԱԿ-ի գլխավոր քարտուղարը նշել է, որ Հարավային Օսիայում հակամարտության տարելիցը «հիշեցում է այդ և Եվրոպայում այլ չլուծված հակամարտությունների կարգավորման անհրաժեշտության մասին»:

«Գլխավոր քարտուղարը հիշեցնում է, որ չնայած Ժնևի միջազգային քննարկումները և արձագանքման ու միջադեպերի կանխման մեխանիզմը վերջին տարիներին զգալիորեն նպաստել են կայունության ամրապնդմանը, անհրաժեշտ է ավելին անել անվտանգության առանցքային և մարդասիրական հարցերի, այդ թվում՝ ներքին տեղահանվածների և փախստականների բարդ դրությանը վերաբերող հարցերի լուծման համար»,- ասել է մամուլի գրասենյակի ներկայացուցիչը և հավելել, որ ՄԱԿ-ը «կշարունակի ամբողջությամբ աջակցել այդ կարևոր մեխանիզմին» և աշխատել Եվրամիության ու ԵԱՀԿ-ի հետ՝ «բոլոր հարցերի վերաբերյալ առաջընթաց գրանցելու համար»:

2008 թվականի լույս օգոստոսի 8-ին սկսվեց վրաց-օսական, նույն ինքը՝ ռուս-վրացական պատերազմը, որը հայտնի է նաև որպես «օգոստոսյան պատերազմ»։ Այն տևեց 5 օր և ավարտվեց վրացական կողմի պարտությամբ։ Դրանից հետո ՌԴ-ն ճանաչեց Հարավային Օսիայի և Աբխազիայի անկախությունը։