«Նիկոլ Փաշինյանի հաջողությունից է կախված մեր բոլորիս հաջողությունը». Սաակաշվիլին՝ ՀՀ վարչապետի քաղաքականության մասին (տեսանյութ)
Վրաստանի նախկին նախագահ Միխեիլ Սաակաշվիլին «Эхо Москвы» ռադիոկայանի գլխավոր խմբագիր Ալեքսեյ Վենեդիկտովին տված հարցազրույցում վերջինիս խնդրանքով մեկնաբանել է Հայաստանում իրավիճակը և վարչապետ Նիկոլ Փաշինյանի քաղաքականությունը:
«Ես շատ սիրում ու հետևում եմ Փաշինյանին, և կարծում եմ, որ նա ամեն ինչ ճիշտ է անում: Միակ բանը՝ նա պետք է փոխի համակարգը: Նրա հրամանները հին իրավապահները դեռ կատարելու են, բայց նրանք պարտադիր պատերազմ են պատրաստելու նրա դեմ: Նա պետք է ժամանակին ցրեր խորհրդարանը: Դեռ ուշ չէ: Նա պետք է ամբողջությամբ փոխի իրավապահ համակարգը, որովհետև նրա հաջողությունը շատ կարևոր է մեր բոլորիս համար»,- ասել է Սաակաշվիլին:
«Ավելի լավ է, որ նա սովորի մեր սխալների վրա: Պետք չէ, որ նա սեփական սխալները գործի, որովհետև նրա հաջողությունից նաև կախված է մեր բոլորիս հաջողությունը»,-հավելել է նա:
Վրաստանի նախկին նախագահը նշել է, որ Հայաստանի վարչապետին կարկառուն մարդ է համարում, և նշել է, որ նա պետք է արագացնի անցկացվող բարեփոխումները, և «քանի դեռ կա ժողովրդի էներգիան՝ այն ճիշտ օգտագործի»:
Սաակաշվիլին ընդգծել է, որ «ազատության, կոռուպցիայի դեմ պայքարն ինքնին դուր չի գալիս ՌԴ նախագահ Պուտինին», այդ պատճառով նա փորձելու է Նիկոլ Փաշինյանին հեռացնել իշխանությունից:
«Ես վստահ եմ, որ Պուտինը պատրաստվում է նրան հեռացնել իշխանությունից: Նա ոչ մի դեպքում չի կարողանա հանգստացնել, համոզել Կրեմլին, որ նման որևէ բան չի անում: Որովհետև ազատության, կոռուպցիայի դեմ պայքարի, փոփոխության գաղափարն ինքնին դուր չի գալիս Պուտինին, նա այն ատում է: Այդ պատճառով նա արշավ կիրականացնի Փաշինյանի դեմ, հատկապես՝ աշնանից»,- պնդել է Սաակաշվիլին:
Տեսանյութում այդ հատվածը կարող եք դիտել 34:20 րոպեից.










