Պապուա Նոր Գվինեայում ԱԽՏՀ գագաթնաժողովի անվտանգությունն ապահովելու դիմաց վարձատրություն չստացած ոստիկանները հարձակվել են խորհրդարանի վրա
Պապուա Նոր Գվինեայի ոստիկանությունը հարձակվել է մայրաքաղաք Պորտ Մորսբիում գտնվող խորհրդարանի շենքի վրա՝ Ասիա-խաղաղօվկիանոսյան տնտեսական համագործակցության (ԱԽՏՀ) գագաթնաժողովի ընթացքում կատարած աշխատանքի դիմաց վարձատրություն պահանջելով: Այս մասին հայտնում է CNN-ը:
Ոստիկանները դժգոհել են, որ ԱԽՏՀ գագաթնաժողովի բարեհաջող անցկացմանն աջակցելու դիմաց իշխանություններից ոչ մի փոխհատուցում չեն ստացել:
«Միանգամայն անընդունելի է, որ մեր ջանքերը չեն գնահատվում: Երախտագիտություն պետք է ցուցաբերվի այն մարդկանց, ովքեր դրան արժանի են, տվյալ դեպքում դա ոստիկանները, զինվորականները և անվտանգության աշխատակիցներն են», - հայտարարել են ոստիկանները:
Ոստիկանները հավաքվել են խորհրդարանի շենքի մոտ և շրջափակել այն, ապա հարձակում գործել: Հաղորդվում է, որ շենքում եղել են նախարարներ և քաղաքական գործիչներ:
Ոստիկաններն ապարդյուն փորձել են կապ հաստատել քաղաքական գործիչների հետ:
Տեղական Post-Courier թերթի հրապարակած լուսանկարներում երևում է, որ շենքի ճակատամասը վնասված է, լուսամուտները՝ ջարդված:
Հարձակման հետևանքով տեղական ԶԼՄ-ների մի քանի աշխատակիցներ աննշան վնասվածքներ են ստացել:













