Սաուդյան Արաբիայի թագավորական ընտանիքի որոշ անդամներ Խաշոգջիի սպանության սկանդալից հետո «երես են թեքել» թագաժառանգից. Reuters

10:23 • 20.11.18

Սաուդյան Արաբիայի թագավորական ընտանիքի անդամներից մի քանիսը սաուդցի լրագրող Ջամալ Խաշոգջիի սպանության առաջացրած միջազգային սկանդալի ֆոնին մտադիր են խոչընդոտել թագաժառանգ արքայազն Մուհամեդ բին Սալման ալ Սաուդի գահ բարձրանալուն: Այս մասին գրում է Reuters գործակալությունը՝ հղում կատարելով թագավորական ընտանիքին մոտ երեք աղբյուրի:


Աղբյուրների համաձայն՝ «տասնյակ արքայազներ» ցանկանում են գահին տեսնել մեկ այլ իրավահաջորդի, սակայն գործողություններ չեն ձեռնարկի, քանի դեռ ողջ է ներկայիս 82-ամյա թագավորը՝ Սալման բին Աբդուլ Ազիզ ալ Սաուդը: Վերջինիս մերձավորները կարծում են, որ թագավորը դժվար դեմ գնա իր «սիրելի որդուն»:


Նույն աղբյուրների հավաստմամբ՝ թագավորական ընտանիքի անդամները թագավորի մահից հետո ցանկանում են գահին տեսնել նրա կրտսեր եղբորը՝ 76-ամյա Ահմեդ իբն Աբդուլ Ազիզ իբն Սաուդին: Ըստ աղբյուրների՝ արքայազն Ահմեդին կաջակցեն նաև արևմտյան երկրները:

Համաձայն Washington Post-ի ավելի վաղ հաղորդման՝ հատուկ ծառայությունները եզրահանգման են եկել, որ սաուդցի ընդդիմադիր լրագրող Ջամալ Խաշոգջիի սպանության հրամանը կարող է արձակած լինել Սաուդյան Արաբիայի թագաժառանգ արքայազն Մուհամեդ բին Սալման ալ Սաուդը:


Հիշեցնենք, որ սաուդցի ընդդիմադիր լրագրողը հոկտեմբերի 2-ին անհետացել էր Ստամբուլում Սաուդյան Արաբիայի հյուպատոսության տարածքում: Ավելի ուշ թուրք քննիչները քիմիական նյութերի հետքեր էին հայտնաբերել Ստամբուլում Սաուդյան Արաբիայի հյուպատոսության այգու ջրհորում: Ենթադրվում է, որ Խաշոգջիի մարմինը ոչնչացվել է քիմիական նյութերի միջոցով: