Թուրքիայի հյուսիս-արևմուտքում պղնձի հանքում պայթյուն է տեղի ունեցել, մի քանի բանվոր մնացել է ներսում

10:37 • 21.11.18

Թուրքիայի հյուսիս-արևմուտքում գտնվող Զոնգուլդակ նահանգի Քիլիմլի շրջանի պղնձի հանքում դեռևս անհայտ պատճառներով տեղի ունեցած պայթյունի հետևանքով փլուզում է տեղի ունեցել, գրում է թուրքական diken.com.tr կայքը:

Հայտնի է, որ հանքում մնացել է 5 բանվոր, նրանցից երկուսին փրկարարներին հաջողվել է դուրս բերել ու տեղափոխել հիվանդանոց: Տուժածների վիճակը բժիշկները ծանր են գնահատել:

Եվս երեք բանվոր շարունակում է մնալ հանքում: Նրանց դուրս բերելու համար ինտենսիվ աշխատանքները շարունակվում են:

2014 թվականի մայիսին Թուրքիայի Մանիսա նահանգի Սոմա քաղաքում հանքի փլուզման հետևանքով մահացել էր 301 մարդ, տուժել՝ 122-ը: