Ֆրանսիայի հյուսիսում ցույցերի հետևանքով տուժել է 7 ոստիկան, բողոքի ակցիաների պատճառով Փարիզում այսօր չի գործի 7 մետրոկայարան (տեսանյութ)

14:05 • 24.11.18

Ֆրանսիայի հյուսիսում «դեղին անթև բաճկոնների» բողոքի ակցիայի մասնակիցները մարմնական վնասվածքներ են պատճառել 7 ոստիկանի, այս մասին տեղեկացնում է BFMTV հեռուստաալիքը:

Միջադեպը տեղի է ունեցել Պա դը Կալե դեպարտամենտում: Ըստ աղբյուրի փոխանցած տվյալների՝ ակցիայի մասնակիցներն Էնեն Բոմոն համայնքում հարձակվել են իրավապահների վրա, շուռ տվել և այրել ոստիկանական մեքենան, ինչի հետևանքով 7 ոստիկան թեթև վնասվածքներ է ստացել:

Զանգվածային բողոքի ակցիաների պատճառով սահմանափակվել է մայրաքաղաք Փարիզում երթևեկությունը. փոխվել են վերգետնյա տրանսպորտի որոշ երթուղիներ, ինչպես նաև փակվել է քաղաքի մետրոյի կենտրոնական 7 կայարան:

Հայտնի է, որ այսօր ցուցարարները բողոքի ակցիաներ կիրականացնեն Փարիզի Մարսյան և Ելիսեյան դաշտերի, Ազգային ժողովի, Պորտ Մայոյի, Բաստիլիայի, Հանրապետության և Համաձայնության հրապարակների տարածքներում:

Սպասվում է, որ մայրաքաղաք կժամանի շուրջ 30 հազար ֆրանսիացի: Քաղաքի փողոցներում անվտանգությունը կապահովի մոտ երեք հազար ոստիկան ու ժանդարմ:

Ինչպես ավելի վաղ հայտնել է tert.am-ը, ցույցերի պատճառով այսօր Էյֆելյան աշտարակը փակ կլինի այցելուների համար:

Հիշեցնենք, որ Ֆրանսիայում վառելիքի գնի աճի և հարկերի բարձրացման դեմ բողոքի ցույցերը սկսվել են նոյեմբերի 17-ից: Բողոքի ակցիաներին մասնակցել է ավելի քան 287.000 մարդ: Ֆրանսիացիները դեմ են իշխանությունների՝ 2019-ին դիզելային վառելիքի և բենզինի գները բարձրացնելու որոշմանը: Փարիզն այս քայլը մեկնաբանել է որպես պայքար օդի աղտոտվածության դեմ և հայտարարել է, որ մտադիր չէ փոխել որոշումը:


 

 

 
 
 
View this post on Instagram

Gilets Jaunes : Une voiture fonce sur la foule @jeroofficiel

A post shared by DuSale (@dusaleofficiel) on